भांगरभूंय | प्रतिनिधी
भागरभूंय । प्रतिनिधी
पेडणेः ज्या कोणाक वकिलाची फी दिवप परवडना अश्या लोकां खातीर जिल्हो आनी तालुको पांवड्या वयल्या न्यायालयांत बाजू मांडपा खातीर मुफत कायदो सेवा उपलब्द आसा. हे येवजणे विशी कायदो सेवासमिती वतीन लोक जाग्रुताय करून चडांत चड लोक हे सेवेचें लाब घेतलें हें पळोवपाक जाय अशें जिल्हो कायदो सेवा प्राधिकरणाची सचीव शांतार्षी कुडचडकार हिणे सांगलें.
जिल्हो कायदो सेवा प्राधिकरणान तांबोशें, उगवें आनी मोपा पंचायतीच्या पालवान उगवेंच्या माऊल मंदीर सभाघरांत आयोजीत केल्ल्या भूसंपादन आनी इन्व्हेंटरी कायद्या संबंदी आयोजीत केल्ले कार्यावळींत कुडचडकार उलयताली. ह्या वेळार सरपंच सुबोध महाले, पंच वांगडी समीक्षा महाले, अॅड. सायमल फर्नांडीस, अॅड. मंदार जोशी, अॅड. प्रसाद शहापूरकर आनी अॅड. तनुजा मांद्रेकार हाजीर आशिल्ली. मोपा आंतरराष्ट्रीय विमानतळा खातीर जायत्या लोकांच्यो जमनी सरकारान घेतल्याात. ते संबंदीची जायती प्रकरणा न्यायालयांत आसात. ते फाटभुंयेर ही कार्यावळ आयोजीत केल्ली.
जमीन संपादनाची प्रक्रिया कशी आसता. आपल्या पूर्वजांच्या नांवार आशिल्ल्यो जमनी वारसदाराच्या नांवांर करपा खातीर इन्व्हेंटरीची प्रकिया कशी करची हाची म्हायती ह्या वेळार प्रसाद शहापूरकारान दिली. पोरणो दस्तावेज मेळोवपा खातीर कितें करचें पडटा, पोरण्या मात्रीजा प्रक्रिये संबंदीची म्हायती मंदार जोशी हाणे दिली कार्यावळीक हाजीर आशिल्ल्यांनी विचारल्ल्या प्रस्नांत शांतार्षी कुडचडकार, प्रसाद शहापूरकार, मंदार जोशी हांणी जापो दिल्यो. उदय महाले हाणे रॉयल्टी नोकऱ्यो हे विशीं प्रस्न विचारले. कार्यावळीचें सूत्रसंचालन तनुजा मांद्रेकारान केले आनी मंदार जोशीन उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
