भांगरभूंय | प्रतिनिधी
‘प्रसार माध्यमा- लेखन आनी वावर’ कार्यशाळेंत उक्तायलें मत वास्कोः अायच्या काळांत मुद्रीत प्रसार माध्यमां रेडियो, दूरदर्शन परस यूट्यूब, इन्स्ट्राग्राम, फेसबूक, ट्विटर अशा सोशल माध्यमांची लोकप्रियता वाडल्या. ह्या सोशल मिडियाक लागून जायते जाण अथीक येणावळूय करतात. विद्यार्थ्यांनी ह्या माध्यमाचो योग्य रितीन वापर करून रोजगाराची संद निर्माण करची, अशें मत ज्येश्ठ पत्रकार संदेश प्रभुदेसाय हांणी उक्तायले.
झुआरी नगरांतल्या एमईएस वसंत जोशी म्हाविद्यालयाच्या कोंकणी विभागान आयोजीत केल्ल्या ‘प्रसार माध्यमा- लेखन आनी वावर’ ह्या एका दिसाचे राज्य पांवड्या वयले कार्यशाळेंत ज्येश्ठ पत्रकार संदेश प्रभुदेसाय मुखेल सोयरे ह्या नात्यान उलयताले.
ह्या वेळार खासा अतिथी ह्या नात्यान गोवा कोंकणी अकादेमीचे अध्यक्ष वसंत सावंत, म्हाविद्यालयाच्यो प्राचार्य डॉ. मनस्वी कामत, कोंकणी विभाग मुखेली प्रा. सत्यवान नायक, कार्यशाळेचे संयोजक प्रा. नलिशा वेळीप हजर आशिल्ली.
संदेश प्रभुदेसाय हांणी गोंयांतल्या विवीध माध्यमांच्या इतिहासाचेर उलोवप केले. नियतकालीक, रेडिओ, दूरदर्शन, टिव्ही चॅनेल हांचो तांणी आपल्या भाशणांत नियाळ घेतलो.
तांणी म्हणलें, कोंकणी प्रसार माध्यमांचो विचार केल्यार बातमी आनी म्हायती व्हिडियाे तयार जावपाक जाय. कोंकणी पत्रकारितेंत नवे प्रयोग जावपाची गरज तांणी उक्तायली.
वसंत सावंत हांणी सांगलें, विद्यार्थ्यांनी प्रसारमाध्यमांचो वापर आपल्या शिक्षणांत बऱ्या पद्दतीन करचो. प्रसार माध्यमांचो विचार केल्यार, आयचे विद्यार्थी डिजिटल माध्यमां कडेन अदीक आकर्शीत जाल्ल्याचे दिसून येता. तांणी डिजिटल माध्यमांचो योग्य वापर केलो जाल्यार तांचो फुडार निश्चीत बरो जावपाक मजत जातली. गोंय कोंकणी अकादेमी विद्यार्थ्यां खातीर जायते कार्यावळी, येवजण्यो राबयता. त्या येवजण्यांचो लाव विद्यार्थ्यांनी आनी शिक्षणीक संस्थांनी घेवचो अशें अावाहन तांणी केले.
हे कार्यशाळेंत तीन सत्रां जालीं. पयल्या सत्रांत प्रा. सुभाष जाण हांणी ‘दूरदर्शन आनी रेडियो खातीर लेखन आनी वापर’ ह्या विशयाचेर विद्यार्थ्यांक मार्गदर्शन केले.
दुसऱ्या सत्रांत ‘मुद्रीत माध्यमां खातीर लेखन’ ह्या विशयाचेर ‘गोवन वार्ता’चे संपादक पांडुरंग गांवकार हांणी मार्गदर्शन केले. जाल्यार पलाश अग्नी हांणी ‘सोशल मिडिया खातीर लेखन’ ह्या विशयाचेर मार्गदर्शन केले.
सत्यवान नायक हांणी येवकार आनी प्रास्तावीक केले. प्रा. डॉ. कामत हांणी सोयऱ्यांक येवकार दिलो.
प्रा. लक्षिता मातोंडकार हांणी सुत्रसंचालन केले जाल्यार प्रा. नलिशा वेळीप हांणी उपकार मानले. किर्ती मामलेकार, आयुषी नायक, सिध्दी नायक हांणी तिनूय सत्रांचे सुत्रसंचालन केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
