भांगरभूंय | प्रतिनिधी
बढती खातीर पात्र उमेदवार मेळना जाल्यारूच ६२ पिराये मेरेन सेवा
पणजी : बढटी खातीर पात्र उमेदवार उपलब्ध जावंक ना जाल्यार भौशीक बांदकाम, वीज, उदका स्रोत आनी उदका पुरवण (डीडीएल) खात्यांच्या मुखेल अभियंत्यांचे निवृत्तीची पिराय ६२ करपाच्या निर्णयाक मंत्रिमंडळान मान्यताय दिली. मुख्यमंत्री डॉ. प्रमोद सावंत हांणी मंत्रिमंडळ बसके उपरांत ही म्हयती दिली.
भौशीक बांदकाम, उदका स्रोत, वीज आनी उदका पुरवण खात्याचे मुखेल अभियंते पदा खातीर शिक्षणीक पात्रताय आनी बर्याच वर्सांचो अणभव गरजेचो आसता. जायते फावट पात्र उमेदवार मेळनाशिल्ल्यान सेवेंत आशिल्ल्या मुखेल अभियंत्यांकमुजतवाड दिवची पडटा. आतां निवृत्तीची पिराय ६२ मेरेन वाडोवपाचो निर्णय सरकारान घेतला. कोणूय उमेदवार बढती खातीर पात्र नासल्यारूच अपवादात्मक स्थितींत निवृत्तीची पिराय ६२ करपाक मान्यताय दिल्ल्याचें मुख्यमंत्री डॉ. प्रमोद सावंत हांणी म्हणलें.
ह्यान फुडें वर्क चार्ज खातीर ज्या कर्मचार्यांक काम दितले तांकां सव्या वेतन आयोगाच्या शिफारशी प्रमाण वेतन मेळटलें. सातवें वेतन आयोग लागू जाल्यार ते प्रमाण वेतन मेळटलें. सध्या वर्क चार्ज खाला जे कर्मचारी आसात, तांकां मात फरक पडचो ना, अशें मुख्यमंत्र्यांनी स्पश्ट केलां. वीज, जलस्रोत, भौशीक बांधकाम खात्यांत बरेच कर्मचारी वर्क चार्ज खातीर घेतात.
कंत्राटी कर्मचार्यांक मेळटलो ईपीएफचो लाव
विवीध खात्यांतल्या कंत्राटी कर्मचार्यांक २०१७मेरेनचे सेवेची ईपीएफ थकबाकी दितले. हे खातीर अडेज ते तीन कोटी रूपयांचो आनीक भार सरकाराक सोसचो पडटलो.
फॉरेन्सीक प्रयोगशाळेंत कंत्राटी भरती
वेर्णाचे फॉरेन्सीक प्रयोगशाळेंत वैज्ञानीक अधिकारी, तंत्रज्ञ, एमटीएस मेळून ७० कर्मचारी कंत्राटी पद्धतीन भरपाचो निर्णय घेतला.
गोंय पशूवैजकी महाविद्यालयाक कुर्टी आनी कोडार वट्ट १ लाख चौरस मीटर जमीन ३३ वर्सांच्या लीज कराराचेर दितले. तशेंच बंदर कप्तान खात्याचे विभाजन करपा खातीर नेम दुरुस्तीक मान्यताय दिली. बंदर कप्तान आनी नदीपरीवहन अशीं दोन खातीं तयार जातलीं.
पर्तगाळ सरकारी मुळावे शाळे खातीर नवी इमारत बांदिल्ल्यान शाळेच्या स्थलांतरणाक मान्यताय दिल्ल्याचें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
