भांगरभूंय | प्रतिनिधी
बंगळुरू : हुलीकट्टी- बेळगांवां सरकारी शाळेंतल्या मुस्लीम मुख्याध्यापक सुलेमान घोरी नायक हांची बदली करपाक एका भुरग्या वरवीं शाळेचे टांकयेंत विखारी द्रव घालपाचो धपको दिवपी प्रकार उक्तडार आयला. पुलिसांनी श्रीराम सेनेच्या थळाव्या जाळवणदाराक अटक केल्या. 14 जुलयाक हो प्रकार घडलो. फाटल्या दोन सप्तकांत शाळेंतले 12 विद्यार्थी दुयेंत जाल्यात. सागर पाटील, नागन गौडा पाटील आनी कृष्णा मदार अशी अटक केल्ल्या तिगांचीं नांवां. एनडीटीव्हीन ही खबर दिल्या.
पुलिसांच्या हवाल्ल्यान दिल्ले हे खबरेंत, सुलेमान हे १३ वर्सां हे शाळेंत मुख्याध्यापक आसात. तांचे वयल्या रागान तांची बदली करपाक बदनामी करपाची म्हूण हो विखारी द्रव टांकयेंत घालपाचो प्रकार जालो. पालकांनी हे विशीं हुस्को उक्तायला.
हे करपाक दुबावितांनी पांचवे यत्तेंतल्या एका विद्यार्थ्याचो वापर केल्ल्याचें कळ्ळां. पुलिसांनी ताका विचारतकच ताणें घडाघड सगली म्हायती सांगली. कृष्णा मदारान हें करपाक सांगलें, अशें ताणें एनडीटीव्हीक सांगलें.
श्रीराम सेनेच्या थळाव्या जाळवणदारान हें सगलें घडोवन हाडलां अशें तपासांत दिसलां. कृष्णा मदाराचें आंतरजातीय प्रेमप्रकरण आसा. तें उक्ताडार हाडपाची सागर आनी नागन गौडा धमकी दिताले. ताचे वयल्यान ताका ब्लॅकमेल करून ह्या दोगांयनीं तें कृत्य करपाक सांगलें, अशें पुलिसांनी पत्रकारांक सांगलें.
सागर हो श्रीराम सेनेचो तालुको पांवड्या वयलो अध्यक्ष आसा. ताणें गुन्यांव कबूल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
