भांगरभूंय | प्रतिनिधी
मडगांव नगरपालिकेंत सावळो गोंदळ
मडगांव: मडगांव पालिकेचो कारभार सांवरत आसतनाच मुख्याधिकाऱ्यांचे बदलेचो आदेश येता आनी लोकांच्या कामांचेर ताचो परिणाम जायत आशिल्ल्याचें दिसून येता. मडगांव पालिकेंतली कोयराची समस्या, महसुलांत वाड करपाचें आव्हान आसतनाच थळाव्या राजकारणाचें आव्हानूय आसा. हाचो परिणाम अधिकारी बदलपाचेर आनी पालिका वाठारांतल्या विकासाचेर जायत आशिल्ल्याचें दिसून येता. आतां नगराध्यक्ष आनी मुख्याधिकारी हांचे मदल्या वादाचो परिणाम विकासकामांचेर जावपाची शक्यताय आसा.
फाटल्या कांय वर्सांचो विचार केल्यार 9 मे 2016 दिसा वाय. बी. तावडे हे मुख्याधिकारी म्हूण आयिल्ले आनी 30 मे 2017 दिसा वर्सभराच्या काळांत तांची बदली जाली. 14 जुलय 2017 दिसा मुख्याधिकारी म्हूण आयिल्ले आग्नेलो फर्नांडीस हांची 23 नोव्हेंबर 2017 दिसा चार म्हयन्यांतूच बदली जाली.
24 नोव्हेंबर 2017 दिसा मुख्याधिकारीपद स्विकारिल्ले जॉन्सन फर्नांडीस हांची आठ म्हयन्या भितर म्हणल्यार 19 जुलय 2018 दिसा बदली केली. उपरांत 19 जुलय 2018 दिसा मुख्याधिकारी सिद्धीविनायक नायक आयले आनी 6 डिसेंबर 2019 दिसा तांची बदली जाली. तांणी लेगीत 17 म्हयने पालिकेचें काम सांबाळ्ळें. अजीत पंचवाडकार हांणी 9 डिसेंबर 2019 दिसा कारभार हातांत घेतलो आनी ऑक्टोबर 2020 दिसा तांची बदली जाली. तांचो कार्यकाळ 10 म्हयन्यांचो उरलो.
उपरांत आयिल्ले आग्नेलो फर्नांडीस हांणी 5 ऑक्टोबर 2020 दिसा मुख्याधिकारीपद स्विकारलें आनी 19 म्हयने पालिकेचो कारभार सांबाळ्ळे उपरांत 20 मे 2022 दिसा तांची बदली केली. ताचे उपरांत रोहीत कदम हांणी 20 मे 2022 दिसा पालिका मुख्याधिकारीपद सांबाळ्ळे. पूण अवघ्या पांच म्हयन्यांत म्हणल्यार 3 ऑक्टोबर 2022 दिसा तांचे बदलेचो आदेश आयलो. ताचे उपरांत मान्युएल बार्रेटो हांचो 4 ऑक्टोबर 2022 ते 15 जून 2023 फक्त आठ म्हयन्यांचो कार्यकाळ थारलो.
आतां गौरीश शंखवाळकार हे मुख्याधिकारी म्हूण काम पळयतात आनी तांकां पालिकेंत स म्हयने जाल्यात. नगराध्यक्षांनी मुख्याधिकाऱ्यांचेर थेट टिका केल्ल्यान आतां परतून एकदां पालिका मुख्याधिकारी बदलपाची शक्यताय आसा. नगराध्यक्षांनी मुख्यमंत्र्यां कडेन चर्चा करतलों अशें सांगलां, आनी अशें जायत जाल्यार विकासकामांचेर ताचो परिणाम जावन सगली सुरवात नव्यान जातली.
मडगांव पालिकेचीं खूबशीं प्रकरणां न्यायालयांत आसात. ते खातीरूय वेळ दिवचो पडटा. खूबशा दाव्यांचेर पालिका मुख्याधिकाऱ्या मुखार सुनावणी सुरू आसा. तशेंच विवीध प्रकारच्या प्रमाणपत्रां खातीर लोकांचे पालिकेंत यो-वच आसता. मडगांव पालिकेंतलो पार्कींग प्रस्न, कोयराचो प्रस्न, सोपो वयल्यान वाद, हाचे पयलीं केल्लो खर्च अशा विवीध प्रस्नांचेर उपाय काडटनाच पंचविसूय प्रभागांतली समस्या सोडोवपा खातीर योग्य प्रशासकी कारभार दवरप आनी उण्या कर्मचाऱ्यां मदीं वेळांत नागरिकांची कामां करपा खातीर मुख्याधिकाऱ्यांक सुरवाती सावनूच धडपड करची पडटा अशें दिसून येता. ताका लागून परतून एकदां नवो बदल हो विकासकामां सयत कारभार डळमळीत करपी थारतलो अशेंच दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
