भांगरभूंय | प्रतिनिधी
37 व्या राजभास दिसा निमतान राजभवनांतल्या दरबार हॉलांत मनयलो सुवाळो
पणजी: 37 व्या राजभास दिसा निमतान 4 फेब्रुवारीक राजभवनांतल्या दरबार हॉलांत गोवा कोंकणी अकादेमीन आयोजीत केल्ले कार्यावळींत स म्हयन्याळी साहित्य पत्रिका ‘अनन्य’ हाच्या जोड अंकाचें मुख्यमंत्री डॉ. प्रमोद सावंत हांचे हस्तुकीं विमोचन जालें.
ह्या वेळार माचयेर तांचे वांगडा केंद्रीय साहित्यअकादेमीचे अध्यक्ष माधव कौशीक, ज्ञानपीठ पुरस्कार सन्मानीत लेखक दामोदर मावजो, राजभाशा संचालनालयाचे संचालक राजू गांवस, गोवा कोंकणी अकादेमीचे प्रभारी अध्यक्ष वसंत भगवंत सावंत, कोंकणी अकादेमीची सचीव मेघना शेटगांवकार, कार्यकारी मंडळाचे वांगडी गोपीनाथ गांवस आनी अकादेमीचे संशोधन सहाय्यक दत्तराज नायक हाजीर आशिल्ले.
आयचे पिळगेक आपले आवयभाशेचो अभिमान आसा आनी तिचे खातीर आपणेय कितेंय तरी करूंक जाय ही भावना तांचे मदीं फळादीक जायत आसा. ‘अनन्य’ अंकाचो यू.जी.सी.च्या कॅर वळेरेंत आस्पाव जाला. भारतीय विद्यापिठां कडेन संबंदीत संशोधकांक आनी शिक्षण जाणकारांक अश्या माध्यमाची भाेव गरज आसता. संशोधकांक आपले सोदनिबंध जाणकारां मेरेन पावोवपाची आनी ताची योग्य मोलावणी करून घेवपाची संद अश्या माध्यमांतल्यान मेळटा. ‘अनन्य’ अंकाक हो दर्जो मेळिल्ल्यान गोंयांत म्हाविद्यालयीन आनी विद्यापीठ पांवड्यार योगदान दिवपी शिक्षणीक जाणकारांक ही एक मोटी संद उक्ती जाल्या अशें संपादक वसंत सावंत हांणी संपादकीय बरोवपांत म्हणलां.
‘अनन्य’अंकाचे संपादक वसंत सावंत आनी संपादक मंडळाचे वांगडी मेघना शेटगांवकार, गोपीनाथ गांवस आनी दत्तराज नायक हांच्या सहकार्याक लागून हो अंक नव्या रुपान आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
