भांगरभूंय | प्रतिनिधी
पणजी : राज्यांत मंत्रिमंडळ फेरबदलाची चर्चा सुरू असतनाच मुख्यमंत्री डॉ. प्रमोद सावंत हांणी दनपरां राजभवनाचेर राज्यपाल पी. एस. श्रीधरन पिल्लई हांची भेट घेतली. हे भेटीक लागून मंत्रीमंडळ फेरबदल आनी नव्या मंत्र्यांचे सोपूत विधीचे चर्चेक आनीक बळगें मेळ्ळें.
वास्तुशिल्पकला, संगीत, फार्मसी आनी फाईन आर्टस महाविद्यालयाचें गोंय विद्यापीठ कॅम्पसांत स्थलांतर जातलें. विद्यापीठाचे कुलपती ह्या नात्यान ह्या विशयाचेर राज्यपालां कडेन मुख्यमंत्र्यांनी चर्चा केल्ल्याची म्हायती सुत्रां कडल्यान मेळ्ळी. वास्तुशिल्पकला महाविद्यालया सयत चार महाविद्यालयांचें विद्यापीठ कॅम्पसांत स्थलांतरण करतले अशी घोशणा मुख्यमंत्र्यांनी अर्थसंकल्पांत केल्ली.
मुख्यमंत्र्यां कडल्यान भाजप मेळाव्यांत जावपी वक्तव्यां तशेंच भेटींक लागून मंत्रिमंडळ फेरबदल चर्चेक नेट आयला. साळगांवच्या भाजप मेळाव्यांत आमदार केदार नायक हांचें प्रमोशन जावप गरजेचें आशिल्ल्यान मुख्यमंत्र्यांनी सांगलें. ह्यान पयलीं कळंगुटच्या मेळाव्यांत मायकल लोबो हांच्या कार्याची दखल घेवन योग्य तें पद तांका दिवपाचें वक्तव्य मुख्यमंत्र्यांनी केल्लें. हाका लागून मंत्री पदा खातीर चर्चेंत आशिल्ले वळेरेंत नावांची भर पडत आसा.
मजगतीं, मगोचे अध्यक्ष दीपक ढवळीकार हांणी प्रदेश भाजप अध्यक्ष दामू नायक हांणी भेट घेतली. हे भेटींत राजकी स्थितीचेर चर्चा जाल्ल्याची म्हायती दामू नायक हांणी दिली. दिल्लींत मंत्री सुदीन ढवळीकार हांचे सयत राष्ट्रीय सरचिटणीस बी. एल. संतोष हांची भेट घेतले उपरांत मगो अध्यक्षांनी प्रदेश भाजप अध्यक्ष दामू नायक हांची भेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
