भांगरभूंय | प्रतिनिधी
युरी आलेमांवः पिळर्ण उज्यांतल्यान धडो घेवन इव्हेंट मॅनेजमेंट बंद करपाचो सल्लो
भांगरभूंय । प्रतिनिधी
मडगांवः पिळर्ण उद्देगीक वसणुकेंतल्या बर्जर कारखान्याक लागिल्लो म्हाभिरांकूळ उजो सगळ्यांचें दोळे उक्ते करपाची घडणूक थारल्या. मुख्यमंत्री डॉ. प्रमोद सावंत हांणी आतां तरी इव्हेंट मॅनेजमेंट बंद करून आपत्ती वेवस्थापनेचेर लक्ष केंद्रीत करपाक जाय. उजो नियंत्रणांत हाडपा खातीर उजो पालोवपी दळाच्या जवानांनी केल्ल्या यत्नांची आपूण तुस्त करतां. मात अशी परिस्थिती हाताळपा खातीर सरकाराची अपूर्ण यंत्रणा पुरायपणान उक्ती जाल्या, अशें विरोधी पक्ष फुडारी युरी आलेमांव हांणी म्हणलां.
फाटल्या विधानसभा अधिवेशनांत आपणें कुंकळ्ळी तशेंच गोंयच्या हेर उद्देगीक वसणुकेंत विवीध बेकायदो कारखान्यां कडेन सरकारी अधिकाऱ्यांचे आडनदरेक लागून दुर्घटणेचो ‘टायम बॉम्ब’ तयार जाता, अशें सांगून सरकाराक सादूर केल्लो. पिळर्णाच्या उज्यान आपलो दावो खरो थारलो. अपघातांक आमंत्रण दिवपी आनी बेकायदोपणान चालू आशिल्ल्या उद्देगीक आस्थापनां वांगडाच सरकाराची तडजोड करपाची वृत्ती परतून एक फावट उक्ताडार आयल्या, अशें आलेमांव हांणी म्हणलां.
कांय दिसां आदीं कुंकळ्ळी उद्देगीक वसणुकेंतल्या एका कारखान्यांत अमोनिया गॅसाची गळटी जाल्ली. हे गळटीच्या मुळाक वचपाचे कश्ट सरकारान घेवंक ना. आपणें लेखी कागाळ केले उपरांत कुंकळ्ळी उद्देगीक वसणुकेंतलो तो बेकायदो तरेन चलपी प्रदुशण करपी कारखानो बंद करपाची शिफारस गोंय राज्य पर्यावरण प्रभाव मोलावणी प्राधिकरणा वरवीं केली, अशें आलेमांव हांणी म्हणलां.
गोंय सरकाराचें उद्देग खातें, कारखाने आनी बॉयलर खातें तशेंच कामगार विभाग आनी हेर खात्यांचे अधिकारी स्वता जावन सुरक्षा उपाय येवजण्यां कडेन घाळपणां आनी प्रदुशण करपी कारखान्यांचेर कारवाय कित्याक करिनात, असो प्रस्न आलेमांन हांणी उपस्थीत केला. पिळर्ण उद्देगीक वसणुकेंतल्या उज्याची उच्च न्यायालयाच्या निवृत्त न्यायाधिशांच्या अधिपत्याखाला उच्च पांवड्या वयली चवकशी जावची, अशी आपली मागणी आसा. तेच समितीक गोंयच्या हेर विवीध उद्देगीक वसणुकेंतले कारखाने आनी आस्थापनां कडल्यान नियामक अटी पाळपाक आनी कसलेय आपत्तीक फुडो करपाची तांची तयारी ह्या संबंदांत परिस्थितीची मोलावणी करपाचे अधिकार दिवचे, अशी मागणी आलेमांव हांणी केल्या.
आतांच आमी शाणें जावंयाः युरी आलेमांव
आपले कडेन विधानसभेंतल्या विवीध प्रस्नांचो जापो आसात. ते वयल्यान गोंयचे खंयचेच उद्देगीक वसणुकेंत कारखाने आनी आस्थापनांचेर खंयच्याच सरकारी प्राधिकरणाचें पुराय नियंत्रण ना. दरेक विभाग एकामेकां कडेन बोटां दाखोवपाचो यत्न करता. हाचो परिणाम पिळर्णां लागिल्ल्या उजो आपत्ती सारकी आसा. पिळर्णां लागिल्ल्या उज्याक लागून दरेका गोंयकारान आतां वेगळो विचार करपाचो वेळ आयला. प्रदुशणाच्या काळ्या कुपां खाला जियेवपाचे काय आपले भलायकेक लुकसाण करपी सगळे कारखाने आनी वेवसाय बंद करपाचे, हो पर्याय आमचे कडेन आसा. चड वेळ जावचे आदीं आतांच आमी शाणें जावपाक जाय, अशें युरी आलेमांव हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
