भांगरभूंय | प्रतिनिधी
पणजी : मुख्यमंत्री डॉ. प्रमोद सावंत हांणी स्ट्रीट प्रोव्हिडन्स एनजीओक सात दिसां भितर दोन म्हयन्यांचो निधी दिवपाचें आस्वासन दिल्ल्याची म्हायती संस्थेचे अध्यक्ष डोनाल्ड फर्नांडीस हांणी दिली. शुक्रारा तांणी मुख्यमंत्र्यांची भेट घेवन राज्यांतल्या मानसीक नदरेन अस्थीर आनी बेघर लोकां विशीं चर्चा केली. ह्या वेळार मुख्यमंत्र्यांनी ह्या विशया विशीं सकारात्मक प्रतिसाद दिल्ल्याचें फर्नांडीस हांणी सांगलें.
अर्थसंकल्पांत स्ट्रीट प्रोव्हिडन्साक निधी मंजूर केला. मात कांय प्रशासकीय कारणांक लागून आमकां जे येवजणे खाला निधी मेळटालो, ती येवजण बायलां आनी बालकल्याण खात्या कडल्यान समाज कल्याण खात्याकडेन प्रवर्ग केल्या. हो बदल १ एप्रिल सावन केला. समाज कल्याण खात्याकडल्यान येवजणेचो लाव घेवपा खातीर पयलीं हे विशीं अधिसुचवणी जारी करची पडटली. हाका लागून ऑगस्ट म्हयन्या मेरेन काळ लागपाची शक्यताय. आशिल्ल्याचें फर्नांडीस हांणी सांगलें.
’आमचे संस्थे कडेन सध्या जाय तसो निधी उपलब्ध ना. संस्थेच्या आसरो घरांत सुमार १९० जाण रावतात. तांचो म्हयन्याचो खर्च खूब आसा. सध्या आमचे कडेन मे म्हयन्या मेरेन पावतले इतलेच पयशे आसात. हाचेर उपाय म्हणून मुख्यमंत्र्यांनी फुडल्या दोन म्हयन्यांचे पयशे पयलींच दिवपाचें आस्वासन दिलां.
हाचे भायर आमी तांकां आयपीएसांत भुरग्यां खातीर विशेश वार्ड नासप, रस्त्यावेल्या दिव्यांगांक पुलिसां कडल्यान सहकार्य मेळना, मानसीक रोगांचेर उपचार करपाक हॉस्पिटलांचो उणाव, असल्या समस्यां विशीं म्हायती दिल्ल्याचें फर्नांडीस हांणी सोंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
