भांगरभूंय | प्रतिनिधी
भाजप युवा मोर्चा : डाक सेवक पदा खातीर कोंकणी सक्तीची
भांगरभूंय । प्रतिनिधी
पणजी : पोस्ट खात्यांतल्या ग्रामीण डाक सेवकांच्या पदां खातीर कोंकणीची सक्ती केल्या. ह्या निर्णया खातीर आमी मुख्यमंत्री डॉ. प्रमोद सावंत हांचे उपकार मानतात. केंद्र तशेंच राज्य पांवड्यार फाटल्या 10 वर्सांत मुख्यमंत्र्यान कोंकणीचे उदरगीती खातीर खूब वावर केला, अशे भाजप युवा मोर्चाचे अध्यक्ष तुषार केळकार हांणी सांगलें.
भाजपाचे कचरेंत आपयल्ले पत्रकार परिशदेंत केळकार उलयताले. ह्या वेळार भाजपा युवा मोर्चाचे आदले अध्यक्ष समीर मांद्रेंकार हजर आसले.
टपाल खात्यांत ग्राम डाक सेवकांच्या पदा खातीर कोंकणी सक्ती करपी कार्यालयीन निवेदनाक मान्यताय दिवपी निर्णयाक आमी मुख्यमंत्री डॉ. प्रमोद सावंत आनी केंद्रांत वावुरपी गोंयच्या भाजपा फुडाऱ्यांक परबीं दितात, अशें केळकार हांणी म्हणलें.
मुख्यमंत्र्यान पुराय प्रक्रियेची फाठपुरवण करून हो विशय केंद्रा मेरेन व्हरून गोंयची अस्मिताय तिगोवन दवरिल्ले खातीर आमी मुख्यमंत्र्याचे उपकारी आसात. केंद्रा कडल्यान हे विशींचो कार्यालयीन निवेदन आयले उपरांत राज्यान ताका रोखडीच मान्यताय दिली. संवसारीक टपाल दिसा निमतान ह्या निर्णया खातीर आमी सरकाराची तोखणाय करतात, अशें केळकार हांणी सांगलें.
कोंकणी सक्तीची जाल्ल्यान गोंयकारांक नोकरेची संद उक्ती जावन गांव आनी शारांनी ग्राम डाक सेवक ह्या पदाचो फायदो हो गोंयकारांकूच जातलो. जे ग्रामीण भाग आसात थंय लोकां कडेन उलोवप हे कोंकणी भाशेनूच जातलें, अशें केळकार हांणी सांगलें. 10 वर्सांत मुख्यमंत्री डॉ. प्रमोद सावंत हांणी कोंकणी भाशे खातीर खूबशी उदरगत केल्या. कोंकणीचो आस्पाव राष्ट्रीय शिक्षणीक धोरणांत केला, 24 ऑगस्टांत संसदेंत कोंकणी खातीर दुभाशी नेमला, विज्ञानीक आनी तकनीकी उतरावळींतल्यान इंग्लीश भाशेंतली हजार परस चड उतरां कोंकणींत तयार केल्यात. भाशीणी अॅपा वरवीं कोंकणी भाशेंत उलयल्यार तें उलोवप देवनागरी भाशेंत टायपींग जातलें हे खातीर यत्न चल्ल्यात, अशीं म्हायती केळकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
