मुख्यमंत्र्याक धमकी दिवपी काणकोणकाराची सुटका

भांगरभूंय | प्रतिनिधी

पुलिसांनी शुक्रारा रातीं केल्ली अटक, विरोधकांची सरकाराचेर टिका

भांगरभूंय । प्रतिनिधी

पणजी : मुख्यमंत्री डॉ. प्रमोद सावंत हांकां जितो पुरपाची गंभीर धमकी दिवपी समाजवावुरपी रामा काणकोणकार हाची काल शेनवारा रातीं जामिनाचेर सुटका जाली. सांकवाळ पंच प्रकरणा वयल्यान काणकोणकार हांणी एका व्हिडियोंत मुख्यमंत्री डॉ. सावंत हांकां जितेच पुरपाची धमकी दिल्या आनी ते तपासकामांत सहकार्य करचें अशी नोटीस धाडूनय पाळो दिनात, अशें स्पश्ट करीत पुलिसांनी शुक्रारा रातीं तांकां अटक केल्ली. मजगतीं, मुख्यमंत्र्याक धमकी आनी काणकोणकाराक अटक हाचे वयल्यान गोंयच्या राजकी आनी समाजीक मळाचेर फाटले दोन दीस बरोच बोवाळ जाल्लो.

चार दिसां पयलीं पत्रकारां कडेन उलयतना, सांकवाळच्या एका गोंयकार पंचाक एक स्थलांतरीत धमकी दिता, ताचो व्हिडियो व्हायरल जाता आनी गृह खातें कांयच कारवाय करिना अशें म्हणीत काणकोणकार हांणी गृह खातें सांबाळपी मुख्यमंत्री डॉ. प्रमोद सावंत हांचेर धमकीवजा वक्तव्य केल्लें. ‘हो व्हिडियो मेळटकच काणकोणकार हांकां चवकशे खातीर आपयिल्ले. मात ते येवंक नाशिल्ल्यान तांकां अटक केली,’ अशें पुलिसांनी सांगलें. काणकोणकार हांकां मुख्य न्याय दंडाधिकाऱ्या सामकार उबे केले तेन्ना 14 दिसांची न्यायालयीन कोठडी दिल्ली. मात शेनवारा रातीं तांची जामिनाचेर सुटका केली. काणकोणकार हांचे आड भारतीय न्याय संहितेच्या कलम 353(2) आनी 351(3) खाला पणजी पुलीस स्टेशनांत बुधवार सांजवेळा कागाळ दाखल जाल्ली. तातूंत आझाद मैदानाचेर पत्रकारां कडेन उलयतना तांणी मुख्यमंत्र्या आड दुस्वास पातळावपी, बदनामी करपी आनी धमकी दिवपी वक्तव्यां केल्यांत अशें म्हणिल्लें. मजगतीं, काणकोणकार हांचे आवय- बापूय हांणी पत्रकारां कडेन संवाद सादलो. तेन्ना आपल्या पुताची कांयच चूक नासतना सरकारान ताका मुद्दाम अटक केल्या, असो आरोप केलो. आम आदमी पक्षाच्या फुडाऱ्यांनी शेनवारा सकाळीं पुलीस स्टेशना भायर काणकोणकार हांचे अटकेचो निशेध केलो.

समाज वावुरप्यांचें तोंड बंद करपाचो यत्न : काँग्रेस

प्रदेश काँग्रेशीन रामा काणकोणकार हांचे अटकेचो खर उतरांनी निशेध केला. गोंयांतलें भाजप सरकार सत्तेचो गैरवापर करता. समाजीक वावुरप्यांचें तोंड बंद करपाचे यत्न सरकारा कडल्यान चालू आसात. ताचोच भाग म्हूण अन्याया आड लडपी रामा काणकोणकार हांकां अटक केल्या, असो दावो प्रदेशाध्यक्ष अमीत पाटकार हांणी केला. रामा काणकोणकार हांणी असो कसलो गुन्यांव केला, जाका लागून ताचें तोंड धांपून ताका गुन्यांवकारा सारके वागयतात, असो प्रस्न तांणी उपस्थीत केलो. काणकोणकार हांची तत्काळ सुटका जाली ना जाल्यार काँग्रेस ओगी बसची ना, अशी शिटकावणी तांणी शेनवारा दनपारां दिली.

गिरीराज पै वेर्णेंकार हांची समाजीक वावुरप्यांचेर टिका

सरकारा आड उलयल्यार स्वता केल्ल्या चुकांतल्यान सुटका जाता, अशें गोंयांतल्या विरोधी पक्षांच्या फुडाऱ्यांक आनी समाजीक कार्यकर्त्यांक दिसता. तेच खातीर ते सरकाराचेर गरजे भायर आरोप करतात. मुख्यमंत्र्यांक जिवेशी मारपाच्यो धमक्यो दितात आनी ताचेर कारवाय जाले उपरांत सूड घेतिल्ल्याचो दावो करतात. पूण र जकारण आनी समाजकारण ह्या चुकीच्या गजालींक थारो दिवचे खातीरची विमो पॉलिसी आसपाक शकना, अशें सांगून भाजपाचे म्हणयारे गिरीराज पै वेर्णेंकार हांणी रामा काणकोणकार हांचेर टिका केली.

अघोशीत आणीबाणी लागून केल्या? : विजय सरदेसाय

गोवा फॉरवर्डाचे अध्यक्ष तशेंच आमदार विजय सरदेसाय हांणी कोणकाणकोणकार हांचे अटके वयल्यान सरकाराचेर टिका केल्या. सरकारा आड कोणूय उलयलो जाल्यार ताका थेट बंदखणींत घालतात. सरकारान गोंयांत अघोशीत आणीबाणी लागू केल्या काय कितें, असो प्रस्न तांणी उपस्थीत केलो. रामा काणकोणकार एसटी समाजा खातीर लडटा. ताका लागून सगळ्यांची ताका सांगात दिवपाची गरज आसा, अशें तांणी म्हणलें.

एसटी समाजान काणकोणकारांच्या फाटल्यान रावचें : पालेकार

राज्यांतल्या अनुसुचीत जमातींचेर जावपी अन्यायाक वाचा फोडपाचें काम रामा काणकोणकार हे फाटल्या कांय वर्सां सावन करतात. ताका लागून तांचेर साबार आरोप दवरून सरकार तांकां आडकावपाक सोदता. अशा वेळार एसटी समाजभावांनी काणकोणकार हांच्या फाटल्यान ठामपणान उबें रावपाची गरज आसा, असो उलो आम आदमी पक्षाचे राज्य निमंत्रक अमीत पालेकार हांणी मारला.