मुख्यमंत्र्यां सयत ३ आमदार राजस्थान मार्गान दिल्लीक : राज्यांत मंत्रिमंडळाचे फेरबदलाचे चर्चेक नेट
भांगरभूंय | प्रतिनिधी
पणजी : मुख्यमंत्री डॉ. प्रमोद सावंत हे आयज शुक्रारा तीन आमदारां सयत अर्थसंकल्पपूर्व बसके खातीर राजस्थानाक गेल्यात. राजस्थानच्यान मुख्यमंत्री आमदारां सयत दिल्लीक वचपाचे आशिल्ल्यान राज्यांत मंत्रिमंडळ फेरबदलाचे चर्चेक नेट आयला.
मुख्यमंत्र्यां सयत मगोचे आमदार जीत आरोलकार, आमदार कृष्णा साळकार आनी आमदार प्रेमेंद शेटूय दिल्लीक गेल्ल्यान जायते तर्कवितर्क उक्तायतात. जैसलमेर – राजस्थानांत अर्थमंत्री निर्मला सितारमण हांचे अध्यक्षते खाला आयज सांजे वेळार अर्थसंकल्पपूर्व बसका जातली. तशेंच जीएसटी परिशदेचीय बसका जातली. हे बसकेक हजर रावपा खातीर मुख्यमंत्री डॉ. सावंत राजस्थानाक गेल्यात. थंयच्यान ते आमदारां सयत दिल्लीक वतले.
संसद अधिवेशनाचो समारोप आयज जाता. उपरांत राज्याच्या मंत्रिमंडळांत बदल जातलो अशी म्हायती सुत्रांनी दिली. मंत्रिमंडळांत बदल जातलो अणें मुख्यमंत्री डॉ. सावंत हांणीय एके मुलाखतींत स्पश्ट केल्लें. हे फाटभूंयेर मुख्यमंत्र्यां सयत तीन आमदारांच्या दिल्ली भेटी विशीं उत्सुकताय निर्माण जाल्या. सभापती रमेश तवडकार, आमदार संकल्प आमोणकार हांचे सयत हेर आमदारूय कांय दिसां आदीं दिल्लीक गेल्ले. ह्या वेळार मुख्यमंत्र्यां सयत मगोचे आमदार जीत आरोलकार आशिल्ल्यान उत्सुकतायेंत भर पडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
