भांगरभूंय | प्रतिनिधी
पणजी : महाराष्ट्र विधानसभा वेंचणुकेक आतां काय दीस उरिल्ल्यान प्रचार निमाण्या पांवड्यार पावला. मुख्यमंत्री डॉ. प्रमोद सावंत, प्रदेश भाजप अध्यक्ष सदानंद शेट तानावडे तशेंच गोंयचे हेर मंत्री महाराष्ट्रांत नेटान प्रचार करतना दिसतात. मुख्यमंत्री डॉ. प्रमोद सावंत हांणी शेनवारा आनी आयतारा लातुर तशेंच पुण्याच्या विधानसभा मतदारसंघांत प्रचार केलो. प्रदेश भाजप अध्यक्ष सदानंद शेट तानावडे हे फाटले कांय दीस कल्याण, वाशी, बेलापूर वाठारांत आसात.
समाजकल्याण मंत्री सुभाष फळदेसाय, आमदार संकल्प आमोणकार, आमदार कृष्णा साळकार, आमदार प्रेमेंद शेट आनी हेर बरेच कार्यकर्ते महाराष्ट्रांत प्रचार करतात. मुख्यमंत्री सावंत हे स्टार प्रचाराक आशिल्ल्यान विवीध वाठारांत म्हत्वाच्या घटकां कडेन संवाद सादपा सयत ते प्रचारसभा घेतात.
संभाजीनगर – पुण्या तांणी उद्देजकां कडेन संवाद सादलो. शेनवारा तांणी लातुर आनी नांदेड हांगा तरणाट्यां कडेन संवाद सादलो. महाराष्ट्रांत डबल इंजिन सरकाराची कामगिरी मुखार दवरून महायुतीक मतदान करपाचो उलो मुख्यमंत्री डॉ. प्रमोद सावंत भाशणांतल्यान करीत आसा.
गोंयचे प्रदेश भाजप अध्यक्ष सदानंद शेट तानावडे हांणी शेनवार, आयतारा कल्याण पूर्व, वाशी, बेलापूर हांगा प्रचारसभा घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
