भांगरभूंय | प्रतिनिधी
मडगांवः मुख्यमंत्री डॉ. प्रमोद सावंत हांच्या 24 एप्रीलाक जाल्ल्या वाडदिसा निमतान गायिल्लें कांतार लोकप्रीय थारलां. आघाडीचे संगीतकार एडवीन डिकॉस्टा हांणी बरयलां आनी यत्ता आठवेंत शिकपी अॅन्ले बार्बोझा हिणें तें गायलां. साबार राजकारणी व्यक्तीं कडल्यान ह्या कांताराची तुस्त तोखणाय चल्ल्या.
किंग ऑफ कोंकणी अल्बम म्हूण फामाद आशिल्ल्या एडवीन डिकॉस्टा हांणी फक्त दोन वरांनी तें कांतार बरयलां. ह्या कांतारान फक्त दोन वरां भितर 25 हजारा वयर व्ह्यूज मेळयले.
गोंयच्या मुख्यमंत्र्यांच्या भोवमानांत आनी वाडदिसा निमतान कुडतरीचे भाजपा फुडारी अँथनी बार्बोधा हांणी व्हिडीयो तयार करून उजवाडायला. अँथनी हाची चली आनी नावेलीच्या पर्पेच्युअल सुकर कॉन्व्हेंट हायस्कुलाची विद्यार्थिनी अॅन्ले बार्बोझा हिणें हें कोंकणी कांतार गायलां.
हें कांतार पुराय गोंया सयत आनी विदेशांत रावपी गोंयकारां मदीं व्हायरल जालां. हे विशीं अँथनी हांणी सांगलें, आमी साश्टीकार आमच्या खाशेलपणा खातीर वळखतात. एकाद्या विशींचे विचार वेगवेगळ्या माध्यमां वरवीं मांडपाचो यत्न करतात. ह्या कांताराची उतरां गोंयांतले सगळ्यांत गतीन संगीत रचपी एडवीन डिकॉस्टा हांचे आसा. तांणी कांताराक चाल लावन रिकॉर्ड करून दिले उपरांत आठ वरांनी कांताराचो व्हिडीयो शूट केलो.
13 वर्सां पिरायेची अॅन्ले हिणें मार्कुस गोन्सल्वीस हांच्या ‘झाडां तेंगशेर’ ह्या तियात्रांत कांतार सादर केलें आनी गोंयच्या तियात्र अकादमीन आयोजीत केल्ल्या भुरग्यांचो तियात्र सर्तींत पयलें इनाम मेळयलें. अॅन्लेन नाझारियो पिंटो हांच्या ‘कन्व्हर्जन’ आनी तिच्या शाळेचो तियात्र ‘देणें दिलें देवान’ हातूंत कांतार गायलां. तेचवरी एंटरटेनमेंट वतीन आयोजीत तळावले जाल्ले ‘ओह मोगा’ कोंकणी संगीत कार्यावळींत वांटो घेतला. आपली मुख्याध्यापिका लिबिया फर्नांडीस, डॉ. स्नेहा भागवत, नाझारियो पिंटो, मार्कुस गोन्साल्वीस, जॉज गोन्साल्वीस आनी हेरांनी आपल्याक गायना खातीर उर्बा दिली, अशें अॅन्ले बार्बोझा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
