भांगरभूंय | प्रतिनिधी
पणजीः 75 व्या प्रजासत्ताक दिसाची इतिहासीक प्रसंगार मुख्यमंत्री डॉ. प्रमोद सावंत हांणी गोंयकारांक परबीं आनी शुभेत्सा भेटयल्या. तशेंच देशाच्या स्वातंत्र्या खातीर बलिदान दिल्ल्या म्हान आत्म्यांक आर्गां ओंपल्यांत.
मुख्यमंत्र्यान संदेशांत म्हणलां, देशांत सगळे कडेन दर वर्सा प्रजासत्ताक दीस व्हड देशभक्तीचे भावनेन मनयतात. 26 जानेवारी 1950 ह्या दिसा संविधान सभाघरान भारतीय संविधानाचो स्विकार केलो आनी आमचो देश सार्वभौम, समाजवादी, धर्मनिरपेक्ष आनी लोकशाय प्रजासत्ताक जालो, जे आमच्या देशाचें मार्गदर्शक तत्व आसा. सांस्कृतीक विविधताय आशिल्लो भारत हो व्हड लोकशाय देश आसा.
प्रजासत्ताक दीस आमकां देशाक पुराय स्वराज्य मेळोवन दिवपा खातीर बलिदान दिल्ल्या स्वातंत्र्य सैनिकांचो आनी देशाक संविधान दिल्ल्या म्हान विद्वान फुडाऱ्यांचो उगडास करून दिता. तांच्या यत्नांक लागून आयज आमी संविधानांतल्या हक्कांचो लाव घेतात. आमी सगळ्यांनी संविधानीक कर्तव्यांक पाळो दिवपाची गरज आसा.
आयज आमी देश आनी राज्याचे उदरगती खातीर तशेंच एकवट आनी शांतिकाय तिगोवन दवरपा खातीर समर्पीत जावया. प्रधानमंत्री नरेंद्र मोदी हांच्या मार्गदर्शना खाला आमच्या सरकारान उदरगतीचे बाबतींत खूबशीं पावलां उबारल्यांत. गोंयच्या दरेकल्या मेरेन कल्याणकारी येवजण्यो पावोवपाक सरकार बांदील आसा. सबका साथ, सबका विकास ह्या तत्वाचेर सरकार काम करता. गोंयाक स्वयंपूर्ण करपा खातीर शिक्षण, भलायकी, रोजगार निर्माण, अश्या मळांचेर सरकारान भर दिला, अशें मुख्यमंत्र्यान म्हणलां. प्रजासत्ताक दिसाच्या आयच्या प्रसंगार आपूण परतून एकदां समेस्त गोंयकारांक परबीं भेटयतां आनी विकसीत भारता खातीर योगदान दिवपाचो आनी गोंयांतली शांतिकाय, एकचार आनी एकवट राखून दवरपाचो उलो मारता, अशें मुख्यमंत्री डॉ. सावंत हांणी आपल्या संदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
