भांगरभूंय | प्रतिनिधी
भंडारी समाजाचे प्रस्न भाजपानूच सोडयल्यात : दामू नायक
भांगरभूंय । प्रतिनिधी
पणजी : भंडारी समाजाच्या समस्यां विशीं मुख्यमंत्री डॉ. प्रमोद सावंत आनी प्रदेश भाजप अध्यक्ष दामू नायक हांणी समाजाचे आदले मंत्री, आमदारां कडेन चर्चा केली. सरकार 2026 त जनगणना करतलें. हाचे पयली भंडारी समाज खासगी स्वरूपाची जनगणना करतलो, अशी म्हायती फुडाऱ्यांनी मुख्यमंत्र्यांक दिली. भंडारी समाजाचे प्रस्न सुटावे करपाचें आस्वासन दितानाच खासगी जनगणनेक मुख्यमंत्र्यांनी मान्यताय दिली, अशी म्हायती आदले आमदार आनी समाजाचे फुडारी किरण कांदोळकार हांणी दिली.
आदले मंत्री दिलीप परूळेकार, मिलिंद नायक, दयानंद मांद्रेंकार, महादेव नायक, जयेश साळगांवकार, आदले आमदार दयानंद सोपटे, किरण कांदोळकार, श्याम सातार्डेकार ह्या भंडारी समाजाच्या फुडाऱ्यांनी मुख्यमंत्री डॉ. प्रमोद सावंत हांची भेट घेतली. ह्या वेळार भाजप प्रदेश अध्यक्ष दामू नायक हाजीर आशिल्ले.
भंडारी समाजाचे तरेकवार प्रस्न तशेंच जनगणने विशीं चर्चा जाली. मुख्यमंत्र्यांनी आदले मंत्री, आमदार हांकां चर्चेक आपयले उपरांत चर्चेक लेगीत बरो प्रतिसाद दिलो. चर्चे विशीं आमी सगळे समाधानी आसात. मुख्यमंत्री डॉ. प्रमोद सावंत आनी अध्यक्ष दामू नायक हांचे आमी उपकार मानतात, अशें किरण कांदोळकार हांणी सांगलें.
ओबीसी, एसटी सयत सगळ्या समाजाचे प्रस्न भारतीय जनता पक्षाच्या सरकारान सुटावे केल्यात. सगळ्यांक वांगडा घेवन पक्षाची वाटचाल चालू आसा. भंडारी समाजाच्या प्रस्नांचेर बसकेंत सकारात्मक चर्चा जाली, अशें बसके उपरांत अध्यक्ष दामू नायक हांणी सांगलें. भंडारी तशेंच ओबीसी कडल्यान जनगणनेची मागणी सेगीत जायत आसा. हे फाटभुंयेर ही बसका म्हत्वाची थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
