भांगरभूंय | प्रतिनिधी
पणजी : शिरगांवचे श्रीलयराई देवीच्या फाटले जात्रेचे फाटभूंयेर मुख्यमंत्री डॉ. प्रमोद सावंत हांणी बिरेस्तारा पुर्वतयारेचो आढावो घेतलो. एप्रीलांत जावपी हे जात्रे मजगतीं भाविकांची सुरक्षितता आनी गर्देचें नियोजन सारकें दवरपाचे नदरेन मुख्यमंत्र्यांनी रस्तो रुंदीकरणाच्या कामाची पळोवणी केली. ह्या दौर्या वेळार तांचे वांगडा थळावे लोकप्रतिनिधी आनी संबंदीत खात्याचे वरिश्ठ अधिकारी हाजीर आशिल्ले.
पोरूं जात्रे वेळार जाल्ले खेटाखेटीचे कांय भाविकांक जीव वगडावचो पडिल्लो. धोंड जावपी भावीक ज्या अरुंद मार्गावेल्यान देवळा कडेन वा मुखेल वाठारांत परततात, त्या मार्गावेल्या जाग्याच्या उणावाक लागून ही घडणूक घडिल्ल्याचें मुळाव्या तपासांत मुखार आयलां. अंदूं प्रशासनान जतनाय घेवपाक खातीरचे उपाय म्हणून देवळाच्या वाठारा कडेन वचपी रस्त्याचें रुंदीकरण करपाचें काम युद्धपांवड्यार हातांत घेतलां.
पळोवणे मजगतीं मुख्यमंत्र्यांनी सरकारी यंत्रणेक सुरू आशिल्ल्ता सगल्या मुळाव्या सुविधांचीं कामां जात्रे पयलीं बेगोबेग पुराय करपाच्यो खर सुचवण्यो दिल्यात. फकत रस्तेच न्हय भाविकां खातीर गरजेच्यो आशिल्ल्या सुविधांचोय तांणी आढावो घेतलो. भाविकांची गर्दी नियंत्रीत करपा खातीर आनी येरादारी कोयंडी टाळपा खातीर रस्तो रुंदीकरण हो सामको म्हत्वाचो निर्णय आशिल्ल्याचें तांणी स्पश्ट केलें.
जात्रेक वाटेकार जावपी हजारांनी भावीक आनी धोंडांनी श्रद्धे वांगडाच स्वताच्या आनी हेरांचे सुरक्षिततायेची काळजी घेवची. अंदूं कसलेच तरेची वायट घडणूक घडची न्हय म्हणून प्रशासन सगले तरेन यत्न करता अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
