भांगरभूंय | प्रतिनिधी
ग्रामीण पत्रकार संघटणेचे ओडिसा अभ्यास भोंवडेंत सभापती सुरमा पाध्ये हांचें सांगणें
वाळपय: गोंयांत भाजपाचें सरकार बरे तरेन कार्य करीत आसा. मुख्यमंत्री डॉ. प्रमोद सावंत हांच्या फुडारपणा खाला राज्याच्या वेगळ्यावेगळ्या मळार बरे तरेन विकास जायत आसा. आत्मनिर्भर भारत आनी स्वयंपूर्ण गोंय हे संकल्पनेंतल्यान गोंयचो वेगळ्यावेगळ्या घटकांचो बरे तरेन विकास जायत आशिल्ल्याचें ओडिसाच्यो सभापती श्रीमती सुरमा पाध्ये हांणी म्हणलें.
गोंयच्या ग्रामीण वाठारांतल्या पत्रकारांक पयलेच फावटी मुख्यमंत्री डॉ. प्रमोद सावंत हांच्या आशिर्वादान ओडिसा राज्याची अभ्यास भोंवडी करपाची संद मेळ्ळी. ह्या वेळार पत्रकारांनी ओडिसा विधानशभेच्यो सभापती श्रीमती सुरमा पाध्ये हांची भेट घेवन तांचे कडेन वेगळ्यावेगळ्या विशयांचेर विस्वातारण चर्चा केली. त्या वेळार त्यो उलयताल्यो.
ह्या वेळार गोंय म्हायती आनी प्रसिद्धी खात्याचे संचालक दीपक बांदेकार हांणी तांचो परंपरीक दिवली भेटोवन गोंयचे वतीन भोवमान केलो.
ह्या वेळार गोंय ग्रामीण पत्रकार संघटणेचे अध्यक्ष उदय सावंत, म्हायती आनी प्रसिद्धी खात्याचे अधिकारी किरण मुननकर, श्याम गांवकार, सिद्धेश सामंत हाजीर आशिल्ले.
ओडिशा विधानभेच्यो सभापती सुरमा पाध्ये हांणी एकूण गोंयांत सुरू आशिल्ले परिस्थितीची म्हायती समजून घेतली.
म्हायती आनी प्रसिद्धी खात्याचे संचालक दीपक बांदेकार हांणी गोंयच्या वेगळ्यावेगळ्या मळा वेली पुराय म्हायती तांकां दिली. गोंय हो शांत प्रदेश. सर्वधर्मीय बरे तरेन हांगा रावतात. विकास होच म्हत्वाचो मुद्दो घेवन गोंयचें भाजपा सरकार कार्य करीत आसा. ग्रांमीण वाठारांतल्या पत्रकारांक ओडिसा राज्याची पुराय म्हायती उपलब्ध जावची हे नदरेंतल्यान मुख्यमंत्री डॉ. प्रमोद सावंत हांणी अभ्यास भोंवडेची संकल्पा मंजूर केली अशें ह्या वेळार तांणी सांगलें.
गोंयांत ग्रामीण आनी शारी पत्रकारांक उपलब्ध जाल्ल्यो वेगळ्योवेगळ्यो येवजण्यो आनी फुडारांतूय ग्रामीण वाठारांतल्या पत्रकारांक आशिल्ल्यो येवजण्यो हे विशींय तांणी सभापती पाध्ये हांकां विस्तारान म्हायती दिली.
ग्रामीण पत्रकार संघटणेचे अध्यक्ष उदय सावंत हांणी अशे तरेची भोंवडी आयोजीत करून गोंयच्या ग्रामीण वाठारांतल्या पत्रकारांक हेर राज्याचो अभ्यास आनी वेगळ्यावेगळ्या मळा वेली म्हायती उपलब्ध करपाची संद मेळोवन दिल्ले खातीर मुख्यमंत्री डॉ. प्रमोद सावंत हांचे उपकार मानले.
गोंय मुक्ती उपरांत पयलेच फावटी ग्रामीण वाठारांतल्या पत्रकारांक सरकारान अशे तरेची सुविधा उपलब्ध करून दिल्या. फुडारांत डॉ. प्रमोद सावंत हांच्या मार्गदर्शना खाला पत्रकारांक मुळाव्यो सुविधा निश्चीतपणान उपलब्ध जातल्यो अशी आस्त ह्या वेळार सावंत हांणी उक्तायली.
हे भोंवडेंत ओडिसा म्हायती आनी प्रसिद्धी खात्याचे संचालक सरोज कुमार सामल (आयएएस) हांचे कडेन जाल्ले विशेश बसकेंत वेगळ्यावेखळ्या विशयांचेर चर्चा केली. ह्या वेळार संचालक दीपक बांदेकार हांणी गोंयच्या पुराय वाठाराची आनी विकासा विशींची म्हायती दिली. संघटणेचे अध्यक्ष उदय सावंत हांणी ग्रामीण वाठारांतल्या पत्रकारांक गोंयांत आशिल्ल्यो येवजण्यो आनी संभाव्य येवजण्यांची म्हायती विस्तारान दिली. ह्या वेळार ओडिसा म्हायती आनी प्रसिद्धी खात्याचे संचालक सामल हांणी ओडिसा राज्याच्या वेगळ्यावेगळ्या मळार विकासाचे धर्तीचेर जावपी क्रांती हे विशींय विस्तारान म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
