भांगरभूंय | प्रतिनिधी
म्हापशें: मुख्यमंत्री डॉ. प्रमोद सावंत हांचो बनावट सोशल मिडिया प्रोफायल तयार करून आनी ताचे वरवीं आदले मुख्यमंत्री सर्गेस्त मनोहर पर्रीकार हांची बदनामी करपी मजकूर वॉट्सअॅपार प्रसारीत केल्ल्या प्रकरणांत पुलिसांच्या सायबर क्रायम विभागान अनवळख्या आड गुन्यांव नोंद केला.
ह्या प्रकरणांत मुख्यमंत्र्याचे ओएसडी गौरीश कळंगूटकार हांणी सायबर क्रायम विभागातं कागाळ केल्या. मुख्यमंत्री डॉ. प्रमोद सावंत हांच्या फेसबुका वयल्या एका पोस्टाचो स्क्रीन शॉट घेतला, आनी ताचेर आदले मुख्यमंत्री पर्रीकार हांचेर टिपणी करपी मजकूर बरयला. उपरांत दुबावितान हो मुख्यमंत्र्याचो बनावट पोस्ट वॉट्सअॅपार प्रसारीत केला.
हो प्रकार बिरेस्तार 11 वेर नदरेक आयले उपरांत मुख्यमंत्री कचेरे वतीन कागाळदार कळंगूटकार हांणी पुलिशेंत कागाळ केल्या. ह्या कागाळीच्या आदारान सायबर क्रायम पुलीस विभागान भादंसंचें कलम 499, 500 आनी म्हायती तंत्रज्ञान कायदो कलम 66 अ आनी 66 क खाला अनवळखी मनशा आड गुन्यांव नोंद केला. फुडलो तपास पुलीस निरिक्षक सतीश पडवळकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
