मुख्यमंत्र्यांचो अर्थसंकल्प सर्वमावेशक

भांगरभूंय | प्रतिनिधी

डॉ. शेट्ये : दिवचले खातीर अडेज कोटींची तजवीज

भांगरभूंय । प्रतिनिधी

दिवचल : मुख्यमंत्री डॉ. प्रमोद सावंत हांणी सादर केल्लो अर्थसंकल्प हो बहुजन हिताय बहुजन सुखाय अश्या स्वरुपाचो आसा. तातूंत सगळ्या घटकांक न्याय दिवपाचो प्रामाणीक यत्न मुख्यमंत्र्यान केला, अशें दिवचलेचे आमदार डॉ. चंद्रकांत शेट्ये हांणी सांगलें.

दिवचल मतदारसंघाच्या सर्वांगी उदरगती खातीर मुख्यमंत्र्यान सध्याच्या बजेटांत अडेज कोटी रुपयांची तजवीज केल्या, हे खातीर डॉ. शेट्ये हांणी घेतिल्ले पत्रकार परिशदेंत मुख्यमंत्र्यांक विशेश परबीं दिलीं आनी तांचे उपकार मानले. ह्या वेळार भाजप मंडळ अध्यक्ष डॉ. कौस्तूभ पाटणेकार, नगराध्यक्ष विजयकुमार नाटेकार हाजीर आशिल्ले.

शारांत प्रशासकीय इमारती खातीर 80 कोटी, रस्त्यां खातीर तशेंच उदक प्रकल्प बांदपाक भरीव तजवीज करतना शार आनी ग्रामीण वाठाराचे उदरगतीक चालना दिवचे खातीर व्हड मजत केल्या. ते खातीर मतदारसंघाचे वतीन आपूण मुख्यमंत्री डॉ. सावंत हांचो उपकारी आसा, अशें डॉ. शेट्ये हांणी सांगलें.

मुख्यमंत्र्यान दरेका मतदारसंघा खातीर 100 कोटींची तजवीज करतना उदरगतीक चालना दिवपाचो निश्चेव केला. फाटल्या तीन वर्सांत साबार येवजण्यो मार्गाक लागल्यात. कांय येवजण्यो कंत्राटदाराक लागून आडकून उरल्यात, तरी लेगीत त्यो पुराय करतले, अशें शेट्ये हांणी सांगलें.

विकसीत भारत विकसीत गोंयचें सपन साकार करपा खातीर मुख्यमंत्र्यान खूबश्यो येवजण्यो आंखल्यात. ताका मूर्त स्वरूप दिवपा खातीर निधीची तजवीज लेगीत करता. हे खातीर उदरगतीक व्हड चालना मेळटली, अशें डॉ. शेट्ये हांणी सांगलें.

आमी दरेका घटकाची उदरगत करचे खातीर बांदील आसात. स्वयंपूर्ण गोंयचे सपन साकार करचे खातीर वेगवेगळ्या येवजण्यांक आमी चालना दिल्या. त्यो पुराय  करपाक आमचो वावर चल्ला, अशेंय डॉ. शेट्ये हांणी सांगलें. डॉ. कौस्तूभ पाटणेकार हांणी मुख्यमंत्र्यांक परबीं दितना अर्थसंकल्प सर्वमावेशक आशिल्ल्यान सगळ्या घटकांक न्याय मेळटलो, असो विस्वास उक्तायलो.