भांगरभूंय | प्रतिनिधी
पणजी : हालींच पर्वरे मुख्यमंत्री डॉ. प्रमोद सावंत हांचे अध्यक्षते खाला भंडारी समाज नोंदणीच्या नुतनीकरणा विशीं दोनूय गटांची बसका घेतली. ह्या वेळार एडहॉक समिती वतीन उपेंद्र गांवकार, जाल्यार दुसर्या गटा वतीन देवानंद नायक हाजीर आशिल्ले. ४५ मिनटां चलिल्ले हे बसकेंत मुख्यमंत्र्यांनी दोनूय पक्षांच्यो बाजू आयकून घेतल्यो. ह्या प्रकरणांत कायद्या प्रमाण योग्य तो न्याय दितले अशें आस्वासन तांणी दिल्ल्याची म्हायती संजीव नायक हांणी दिली.
उच्च न्यायालयान दिल्ल्या निर्देशा उपरांत राज्य सरकारान सोसायटी नोंदणी अधिनियम, १८६०च्या कलम ३ सी आनी २० एए नुसार समाजाच्या नोंदणीच्या नुतनीकरणा विशीं १९ फेब्रुवारी २०२६ दिसा नोटीस जारी केल्ली. हे नोटीसींत दोनूय पक्षांक मुख्यमंत्र्यां मुखार सुनावणीे खातीर हाजीर रावपाचे निर्देश दिल्ले. हे विशीं शुक्रार २० फेब्रुवारीक मंत्रालयांत बसका जाली.
बसकेंत आमी आमची भुमिका स्पश्टपणान मांडली. आमी समाजांत पारदर्शकताय आनी एकवट परत स्थापीत करपा खातीर सरकार-नियुक्त प्रशासकाच्या देखरेखी खाला मुक्त आनी निश्पक्ष वेंचणुको घेवप गरजेचें आशिल्ल्याचें मुख्यमंत्र्यांक सांगलें.
हे विशींचें सत मुखार येता. दुसर्या गटान केल्ले फाटबळाचे दावे तिगूंक शकले नात. कारण तांचे समितींतल्या कांय वांगड्यांनी तांचे पसून अंतर दवरलां.
समाजाच्या गैरवापर जाल्ल्या दरेका रुपयाची वसुली करपा खातीर आनी ताका जापसालदार आशिल्ल्यांक उत्तरदायी थारपाक आमी बांदील आसात. आमकां तुमच्या न्यायवेवस्था, प्रशासन आनी न्याय प्रणालीचेर पुराय विस्वास आसा. हें पावल सगल्या वांगड्यां खातीर न्याय तोडगो काडपाचे दिकेन एके म्हत्वाचें पावल आसा. सताक जैत मेळटलें आनी न्याय मेळटलो अशी खात्री आशिल्ल्याचें संजीव नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
