भांगरभूंय | प्रतिनिधी
पणजी: राज्य मंत्रीमंडळांत फेरबदलाच्यो चर्चा सुरू आसतनाच मुख्यमंत्री डॉ. प्रमोद सावंत हांणी शेनवारा रातीं दिल्लीक गेले आनी आयतारा दनपारां ते गोंयांतूय पावले. दिल्ली भेटी वेळार तांणी भाजपाच्या कांय वरिश्ठ फुडाऱ्यांची भेट घेवन चर्चा केली. फुडल्या कांय दिसांनी मुख्यमंत्री आनी भाजप प्रदेशाध्यक्ष दामू नायक दोगूय दिल्लीक वचपाचे आसात अशी म्हायती भाजपांतल्या गोपांनी ‘भांगरभूंय’ कडेन उलतना दिली.
राज्य मंत्रीमंडळांत फेरबदल जातले हे निश्चीत आशिल्ल्यान गोंयच्या लोकांचे लक्ष फाटल्या कांय म्हयन्या सावन मुख्यमंत्री डॉ. प्रमोद सावंत आनी भाज प्रदेशाध्यक्ष दामू नायक हांचे दिल्ली भोंवडे कडेन लागिल्लें आसा. अशे स्थितींत शेनवारा रातीं मुख्यमंत्री दिल्लीक गेल्ल्यान ही भेट फेरबदला विशींच आसतली असो अदमास राजकी मळार उक्तायतात.
मुख्यमंत्र्यांनी दिल्लींत वचून कांय वरिश्ठ फुडाऱ्यांची भेट घेतली. तशेंच उपचारा खातीर दिल्लींत खाजगी हॉस्पिटलांत आशिल्ल्या मंत्री आलेक्स सिक्वेरा हांकांय ते मेळिल्ल्याचे गोपांनी सांगलें.
मजगतीं, मंत्रीमंडळ फेरबदलाचे फाटभुंयेर मुख्यमंत्री डॉ. प्रमोद सावंत फाटल्या कांय म्हयन्यां सावन दिल्लीत वचून भाजपाच्या वरिश्ठ फुडाऱ्यांच्यो गांठीभेटी घेत आसात. पूण, फेरबदलाचेर केन्ना म्होर बसतली हें अजून लेगीत स्पश्ट जाल्लें ना. सद्याचे स्थितींत सद्याच्या मंत्रीमंडळांतल्यान तीन मंत्र्यांक काडून ताचे सुवातेर तीन आमदारांक मंत्रीपदाचो सोपूत दिवपाचें निश्चीत जालां. पूण मगोक सरकारांतल्यान कुशीक दवरल्यार चार आमदारांक मंत्रीमंडळांत सुवात मेळपाची शक्यताय आसा. ते विशींची फुडली चर्चा करपा खातीर मुख्यमंत्री आनी प्रदेशाध्यक्ष दामू नायक फुडल्या कांय दिसां भितर दिल्लीची भोंवडी करपाचे आसात अशेंय गोपांनी स्पश्ट केलें.
भाजपाचो एक आमदार दिल्लींत
मुख्यमंत्री डॉ. प्रमोद सावंत हांच्या शेनवारच्या दिल्ली भोंवडे वेळार भाजपाचो आनीक एकलो आमदार दिल्लींत आशिल्लो. ताका लागूनय लोकां मदीं चर्चा सुरू आशिल्ली. पूण हे भोंवडे विशीं आयतारा पत्रकारांनी मुख्यमंत्री डॉ. प्रमोद सावंत हांकां विचारलें तेन्ना आपली दिल्ली भोंवडी खाजगी आशिल्ली अशें म्हणून तांणी हाचेर उलोवपाचें टाळ्ळें.
मंत्री अस्वस्थ; इत्सुकां मदीं उमेद
मुख्यमंत्री डॉ. प्रमोद सावंत हांणी अचकीत दिल्ली भोंवडी केल्ल्यान कांय मंत्र्यां मदीं परतून खवदळ पडला. जाल्यार, मंत्रीपद मेळपाची आस्त आशिल्ल्या आमदारां मदीं उमेद पातळ्ळ्या. पूण दिल्ली भेटींत मुख्यमंत्र्यांनी खंयच्या फुडाऱ्यांची भेट घेतली हें अजून लेगीत स्पश्ट जावंक नाशिल्ल्यान मंत्री आनी इत्सुकां मदीं शांततायेचें वातावरण आसा. ह्या सगल्यांचें आतां मुख्यमंत्री आनी प्रदेशाध्यक्षांच्या येता ते दिल्ली भोंवडे कडेन लक्ष लागून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
