भांगरभूंय | प्रतिनिधी
पणजीः मुख्यमंत्री डॉ. प्रमोद सावंत हांणी गोंयकारांक चवथीची उर्बेभरीत परबीं आनी शुभकामना दिल्या. एकवट, शांतिकाय आनी समृद्धीचें प्रतीक आशिल्ली चवथ दरेकल्याचे जिणेंत खुशालकाय घेवन येवं, अशें तांणी मागलां.
मुख्यमंत्र्यान आपल्या संदेशांत म्हणलां, गणपती बाप्पा हें गोंयकारांचें प्रीय दैवत. गणपतीची मुर्ती घरांत येता आनी घराघरांनी उमेदीचें वातावरण तयार जाता. चवथ हो आमचे खातीर पवित्र सण. घराघरांनी गणपतीची विधिवत पुजा- प्रार्थना, आरती करतात. चवथीच्या सणांतल्यान समाजांत एकवट, समाजीक एकचार वाडीक लागता.
चवथी निमतान गोंय सरकारान स्वयंपूर्ण गोंय उपक्रमा खाला चवथ बाजार सुरू केला. लोकांक goaebazaar.com ह्या ऑनलायन पोर्टला वयल्यान फराळ आनी माटोलीच्या सामानाची खरेदी करपाक मेळटा. ह्या उपक्रमा वरवीं शेतकार, ल्हान वेवसायीक आनी कारागिरांक उर्बा दिवपाचो सरकाराचो यत्न आसा, अशें मुख्यमंत्र्यान म्हणलां. गोंयकारांनी चवथ भक्तीभावान मनोवन समाजांत शांतिकाय आनी भावपण वाडोवचें, अशें मुख्यमंत्री डॉ. सावंत हांणी आपल्या संदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
