भांगरभूंय | प्रतिनिधी
पणजी: गोंयच्या टॅक्सी वेवसायाक शिस्त लावपा खातीर आनी प्रवाशांचे सोयी खातीर राज्य सरकारा कडल्यान प्रस्तावीत आशिल्ल्या ’डिजिटल टॅक्सी धोरणा’ विशीं मुख्यमंत्री डॉ. प्रमोद सावंत हांची बिरेस्तारा पर्वरेच्या मंत्रालयांत राज्यांतल्या ३५ टॅक्सी संघटणांच्या प्रतिनिधीं वांगडा म्हत्वाची बसका जाली. हे बसकेंत डिजिटल मीटर, ऍप-आधारीत सेवा आनी टॅक्सी दरांचें सुसूत्रीकरण अश्या म्हत्वाच्या मुद्यांचेर सविस्तर चर्चा करतले.
राज्यांतल्या टॅक्सी चालकांनी पर्यटकांची करपी कथीत लूट आनी टॅक्सी चालकांक भेकडावपी समस्यांचेर कायमचो तोडगो काडपा खातीर सरकार हें नवें धोरण हाडपाचे तयारेंत आसा. मुख्यमंत्र्यांनी स्पश्ट केलें, हें धोरण फकत पर्यटकांच्या हिता खातीर न्हय, टॅक्सी चालकांच्या वेवसायांत पारदर्शकताय हाडपाक आनी तांची सुरक्षा सुनिश्चीत करपाक आसा. डिजिटल प्रणालीक लागून पर्यटकांचो विस्वास वाडटलो, जाका लागून निमाणें थळाव्या टॅक्सी वेवसायाकूय फायदो जातलो, असो विस्वास तांणी उक्तायलो.
टॅक्सी संघटणांचे प्रतिनिधी हे बसकेंत तांचे विवीध दुबाव आनी मागण्यो मुख्यमंत्र्यां मुखार मांडटले. हातूंत मुखेलपणान खाजगी ग्रिगेटर कंपन्यांचे आव्हान आनी डिजिटल मिटरांतल्या तांत्रीक आडमेळ्यांचो आसपाव आसतलो. हे बसकेक येरादारी खात्याचे वरिश्ठ अधिकारीय हाजीर आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
