भांगरभूंय | प्रतिनिधी
विजय सरदेसायः काणकोणां सेव्ह म्हादय सेव्ह गोवाची सभा
भांगरभूंय । प्रतिनिधी
काणकोणः मुख्यमंत्री डॉ. प्रमोद सावंत सध्या केंद्र आनी कर्नाटक सरकाराच्या हातांतलें बावलें जालां. सध्या ते खाजगी जेट विमान घेवन सगळे कडेन भोंवतात. म्हादय ही गोंयची जिवनदायनी आसा आनी ती फुडले पिळगे खातीर सांबाळून दवरप गरजेची आसा, अशें गोवा फॉरवर्ड पक्षाचे आमदार विजय सरदेसाय हांणी सांगलें.
चावडी काणकोणच्या पोरण्या बसस्टॅण्डाचेर जाल्ले सेव्ह म्हादय सेव्ह गोवाचे जाहीर सभेंत सरदेसाय उलयताले. ह्या वेळार माचयेर प्रशांत नायक, संदेश तेलेकार, फा. बॉलमॅक्स परेरा, सांखळेचे नगराध्यक्ष राजेश सावळ, प्रतिमा कुतिन्हो, रामा काणकोणकार, तारा केरकार, नगरसेवक शुभम कोमरपंत, आदले नगराध्यक्ष राजेंद्र देसाय, शंकर पोळजी, जनार्दन भंडारी, जयेश आनी हेर कार्यकर्ते हाजीर आशिल्ले.
म्हादयच्या संरक्षणा खातीर आंदोलन करप्यां आड सरकार गुन्यांव दाखल करता. नोकरीचेर आशिल्ल्यांची सतावणूक करता. म्हादयचें उदक घुंवडावपाचो निर्णय मुख्यमंत्र्यांचे सहमतीन जाला. मात, लोक आतां ओगी बसचे नात. आयज मेरेनच्या इतिहासांत अन्याया आड काणकोण म्हालांतल्या लोकांनी सदांच फुडाकार घेतला. ह्या म्हालांतले लोक फुडें सरले म्हूण गोंय महाराष्ट्रांत वचपा पसून वाचलें, कोंकणी राजभास जाली. ताका लागून म्हादय वाटावपा खातीर लेगीत अशाच संघटीत लड्याची गरज आसा. सगळ्यांनी हो लडो दिवपाक जाय, असो उलो सरदेसाय हांणी मारलो.
कांय म्हयन्यांनी कर्नाटकांत विधानसभा वेंचणूक जावपाची आसा. ताचो प्रचार करचे खातीर म्हादयक जिवनदायिनी मानपी गोंयच्या भाजपा फुडाऱ्यांनी वच्चें न्हय. जे गोंयचे फुडारी कर्नाटकांत भाजपाच्या प्रचारा खातीर वतले तांकां सुर्याजी पिसाळ ही पदवी दितले, अशें प्रशांत नायक हांणी सांगलें.
जनार्दन भंजारी, संदेश तेलेकेर, प्रतिमा कुतिन्हो, तारा केरकार, रामा काणकोणकार, शंकर पोळजी, राजेश सावळ हांणी ह्या वेळार सरकाराचेर सणसणीत टिका केली. सुत्रसंचालन विकास भगत हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
