भांगरभूंय | प्रतिनिधी
पणजीः आदिवासी विद्यार्थ्यां खातीर (एसटी) धावे आनी बारावे परिक्षेचे शुल्क भरपा खातीर सरकारान मान्य केल्ल्या मुखामंत्री शिक्षण सहाय्य येवजणेचो 4177 विद्यार्थ्यांक फायदो जातलो. मुख्यमंत्री शिक्षण सहाय्य येवजणे खातीर अधिसुचोवणी जारी जाल्या आनी ताका वर्सांक 67.92 लाख रुपया खर्च येतलो. हेर येवजणेचो लाव घेवपी विद्यार्थी हे येवजणे खातीर पात्र थारतले.
धावेच्या आदिवासी विद्यार्थ्यांक परिक्षा शुल्का खातीर 1550 रुपया अर्थीक मजत मेळटली. बारावेच्या विद्यार्थ्यांक 1700 रुपया अर्थीक मजत मेळटली. धावेतल्या 2,060 आनी बारावेतल्या 2,117 विद्यार्थ्यांक हे येवजणेचो लाव मेळटलो. धावी आनी बारावी मेळून वट्ट 4177 विद्यार्थ्यांक हे येवजणेचो लाव मेळटलो.
गोंयांत कायमचे रावपी सरकारी शाळा आनी उच्च माध्यमीक शाळांतले विद्यार्थीच हे येवजणे खातीर पात्र थारतले. पात्र विद्यार्थ्यांनी अर्जां बरोबर एसटी प्रमाणपत्र जोडप गरजेचें. शाळेन पुराय अर्ज तपासून तो सादर करपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
