भांगरभूंय | प्रतिनिधी
मंत्रीमंडळ फेरबदल, भाजप-मगो युतीचेर जातली चर्चा
भांगरभूंय । प्रतिनिधी
पणजी : संसद अधिवेशन 4 एप्रीलाक सोंपता. गोंय मंत्रीमंडळ फेरबदल आनी भाजप-मगो युती संबंदांतले फुडले चर्चे खातीर मुख्यमंत्री डॉ. प्रमोद सावंत आनी भाजप प्रदेशाध्यक्ष दामू नायक 5 एप्रीला उपरांत दिल्ली वतले, अशी म्हायती भाजपांतल्या सुत्रांनी बुधवारा ‘भांगरभूंय’ कडेन उलयतना दिली.
फाटल्या कांय म्हयन्यां सावन गोंयांत मंत्रीमंडळ फेरबदलाचे चर्चेक ओतो आयला. तातूंत आतां मुख्यमंत्र्यान मांद्रें आनी प्रियोळांत केल्ल्या विधानांक लागून युतीचो विचार करून मंत्रीमंडळांत फेरबदल जातलो काय कितें, असोय प्रस्न निर्माण जाला.
मुख्यमंत्री आनी दामू नायक हांणी फाटल्या कांय दिसांनी दिल्ली भोंवड्यो करून फकत मंत्रीमंडळ फेरबदला विशीं केंद्रीय नेतृत्वा कडेन चर्चा केल्ली. पूण आतां युतीचो विशय साणीर आयिल्ल्यान युती तिगोवची काय आतांच तोडपाची हें लक्षांत घेवन मंत्रीमंडळांतल्या फेरबदलाचो निर्णय जातलो. संसद अधिवेशनाक लागून प्रधानमंत्री नरेंद्र मोदी, गृह मंत्री अमीत शाह हांचे सयत हेर फुडाऱ्यां कडेन मुख्यमंत्री आनी दामू नायक हांची हे संबंदांत खोलायेन चर्चा जावंक ना. पूण संसद अधिवेशन सोंपताच हे दोनूय फुडारी दिल्ली वचून मंत्रीमंडळ फेरबदला संबंदांत वरिश्ठां कडेन चर्चा करतले आनी ते उपरांत रोखडोच मंत्रीमंडळांत फेरबदल जातलो, अशें सुत्रांनी सांगलें. मजगतीं, मंत्रीमंडळांत फेरबदल करतना ज्या मंत्र्यां कडेन पेझाद खातीं आसात, तांचे कडलीं कांय खातीं नव्या मंत्रीमंडळांत नव्यान दाखल जावपी मंत्र्यां कडेन दिवपाचो विचार मुख्यमंत्री डॉ. प्रमोद सावंत हांणी केला. पूण ताका कांय मंत्र्यांनी हरकत घेतिल्ल्यान हे विशींय मुख्यमंत्री फुडले बसकेंत वरिश्ठां कडेन चर्चा करतले, अशें सुत्रांनी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
