भांगरभूंय | प्रतिनिधी
एनडीए पक्षांच्या कार्यकर्त्यांच्या संमेलनांत केलें मार्गदर्शन
भांगरभूंय । प्रतिनिधी
पणजीः बिहारांतल्या पटना शारांत शेनवारा आयोजीत केल्ल्या एनडीए पक्षांच्या कार्यकर्त्यांच्या संमेलनांत मुख्यमंत्री डॉ. प्रमोद सावंत हांणी मार्गदर्शन केलें. युवा शक्ती, नारी शक्ती, किसान कल्याण आनी गरीब कल्याण ह्या बळग्याचेर बिहाराच्या दरेका कोनशांत सेवा दिवपाक आमी बांदील आसात, अशें मुख्यमंत्री डॉ. सावंत हांणी उलयतना सांगलें. हे कार्यावळींत केंद्रीय मंत्री गिरिराज सिंग, बिहार मंत्री नितीन नबीन, खासदार डॉ. संजय जयस्वाल हांणी हेर मानेस्त हाजीर आशिल्ले.
मुख्यमंत्री डॉ. सावंत हांणी प्रधानमंत्री नरेंद्र मोदी आनी मुख्यमंत्री नीतीश कुमार हांच्या फुडारपणा खाला विकसीत भारत, विकसीत बिहाराचो संकल्प हाका तेंको दिलो. उपरांत थळाव्या माध्यमां कडेन तांणी संवाद सादलो. डबल इंजीन सरकाराक लागून बिहाराची उदरगत जाल्या. हांगा येतकच म्हाका आंतरराष्ट्रीय शारांत आयिल्ले वरी दिसता. येवपी वेंचणुकेंत बिहारांतले लोक डबल इंजीन सरकाराक पसंत करतले, अशेंय तांणी सांगलें.
आयज आनी फाल्यां मुख्यमंत्री डॉ. सावंत बिहार भोंवडेर आसतले. ह्या वेळार थळाव्या कार्यकर्त्यां वांगडा हेर लोकांक मेळटले. हाचे आदीं तें बिहाराचे उपमुख्यमंत्री सम्राट चौधरी हांकां मेळ्ळे. ह्या वेळार बिहार आनी गोंय विकसीत भारत 2047 खातीर एकठांय काम करपा विशीं चर्चा जाली. हाचे भायर केंद्रीय मंत्री गिरिराज सिंग, बिहाराचे मंत्री नितीन नबीन, खासदार डॉ. संजय जयस्वाल हांचे कडेनूय वेगवेगळ्या विशयांचेर चर्चा केली.
काँग्रेसीच्या काळांत लोकशाय धोक्यांत
काँग्रेसीच्या काळांत भारतांत लोकशायेक चड धोको आशिल्लो अशें डॉ. सावंत हांणी सांगलें. सध्याचें मोदी सरकार ‘सबका साथ सबका विकास’ ह्या तत्वाचेर विस्वास दवरता. हाकाच लागून बिहारांत तशेंच पुराय देशांत मुळाव्यो सुविधा आनी मनीस संसाधन उदरगत आमकां दिसता, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
