भांगरभूंय | प्रतिनिधी
-भाजपाच्या स्टार प्रचारका मदीं गोंयचे एकमेव डॉ. प्रमोद सावंतपणजीः प्रधानमंत्री नरेंद्र मोदी, गृहमंत्री अमीत शाह, भाजपा अध्यक्ष जे. पी. नड्डा सयत 40 स्टार प्रचारकां मदीं भाजपान गोंयचे मुख्यमंत्री डॉ. प्रमोद सावंत हांचें नांव आस्पावन घेतलां. देखून फुडले 20 दीस मुख्यमंत्री डॉ. सावंत महाराष्ट्रांतल्या वेगवेगळ्या वाठारांनी प्रचार करतले.
महाराष्ट्र विधानसभे खातीर 20 नोव्हेंबराक एकाच टप्प्यांत मतदान जातलें, आनी 23 नोव्हेंबराक निकाल जाहीर जातले. भाजपा वतीन मुख्यमंत्री एकनाथ शिंदे हांची शिवसेना आनी अजीत पवार हांची राष्ट्रवादी काँग्रेस युतींतल्यान 288 जाग्यांचेर वेंचणूक लडयतात. भाजपान जिखून घेतिल्ल्या चडशा जाग्यांचेरूय उमेदवार जाहीर केल्यात. उपरांत शेनवारा महाराष्ट्र विधानसभा आनी नांदेड लोकसभा मतदारसंघांतल्या पोटवेंचणुके खातीर पक्षान 40 स्टार प्रचारकांची वळेरी जाहीर केली.
हे वळेरेंत प्रधानमंत्री नरेंद्र मोदी, संरक्षण मंत्री राजनाथ सिंग, भाजपाचे अध्यक्ष नड्डा, गृहमंत्री अमीत शाह, केंद्रीय मंत्री नितीन गडकरी, उत्तर प्रदेशाचे मुख्यमंत्री योगी आदित्यनाथ हांचे उपरांत गोंयचे एकमेव मुख्यमंत्री डॉ. प्रमोद सावंत हांचें नांव आस्पावन घेतलां. ते उपरांत गुजरातचे मुख्यमंत्री भूपेंद्र पटेल, छत्तीसगढचे मुख्यमंत्री विष्णू देव साई, मध्य प्रदेशाचे मुख्यमंत्री मोहन यादव, राजस्थानचे मुख्यमंत्री भजनलाल शर्मा, हरियाणाचे मुख्यमंत्री नायब सिंग सैनी, आसामाचे मुख्यमंत्री हेमंत विश्वा शर्मा आनी कांय केंद्रीय फुडारी हांचोय आस्पाव केला.
———————–
भाजपाच्या केंद्रीय फुडाऱ्यांनी धरलाे नेट
हे खेपे भाजपाचें केंद्रीय फुडारी महाराष्ट्रांत भाजपाच्या फुडारपणा खाला युती सरकार घडोवपाची तयारी करता. ताचो एक भाग म्हूण राज्यसभा खासदार आनी भाजपाचो प्रदेश अध्यक्ष सदानंद शेट तानावडे हांचे वांगडा हेर कांय मंत्री आनी आमदारांक महाराष्ट्रांतल्या मतदारसंघांचेर प्रभारी जावपाची जापसालदारकी दिली. आतां स्टार प्रचारकां मदीं मुख्यमंत्री डॉ. सावंत हांची थंय ‘एंट्री’ जातली.
—————————–
महाराष्ट्रा कडेन मुख्यमंत्र्याचे अखंड नातें
1) गोंयचे शिमेचेर मुख्यमंत्री डॉ. प्रमोद सावंत हांचो एक अखंड संबंद आसा. महाराष्ट्रांतल्या प्रस्नांचो आनी समस्यांचो ताचे कडेन अचूक अदमास आसा.
२) डॉ. सावंत हांणी विधानसभा आनी लोकसभा वेंचणुकेंत महाराष्ट्रांतल्या भाजपा उमेदवारांचो प्रचार करून तांकां वेंचून काडल्यात. देखून महाराष्ट्रांतल्या लोकांक नेमके कितें जाय हाची तांकां जाणविकाय आसा.
३) मुख्यमंत्री डॉ. सावंत हांच्या ह्या अणभवाचो पुराय उपेग विधानसभा वेंचणुकेंत करपाचो निर्णय घेतले उपरांतच भाजपाच्या केंद्रीय फुडाऱ्यांनी सावंत हांकां स्टार प्रचारकांच्या वळेरेंत आस्पाव केल्ल्याची म्हायती भाजपांतल्या सुत्रांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
