मुख्यमंत्री डॉ. प्रमोद सावंत फाल्यां पुराय करतात 7 वर्सांचो कार्यकाळ

भांगरभूंय | प्रतिनिधी

19 मार्च 2019 दिसा घेतलो सगल्यांत पयलीं मुख्यमंत्रीपदाचो सोपूत

पणजी : मनोहर पर्रीकार हांच्या मरणा उपरांत मुख्यमंत्री म्हूण सोपूत घेतिल्ले डॉ. प्रमोद सावंत हे फाल्यां 19 मार्चाक 7 वर्सांचो कार्यकाळ पुराय करतात. 19 मार्च 2019 ह्या दिसा तांणी मुख्यमंत्रीपदाचो सोपूत घेतिल्लो. 2022 वर्सा विधानसभा वेंचणूक जाले उपरांत लेगीत तेच राज्याचे मुख्यमंत्री जाले.

आदले मुख्यमंत्री मनोहर पर्रीकार हांची मंगळारा पुण्यतीथ जाली. मनोहर पर्रीकार हांकां 17 मार्च 2019 ह्या दिसा मरण आयले उपरांत 19 मार्च 2019 दिसा डॉ. प्रमोद सावंत हांणी मुख्यमंत्रीपदाचो सोपूत घेतलो. मुख्यमंत्री जावचे पयलीं ते सभापती आशिल्ले. मुख्यमंत्री डॉ. प्रमोद सावंत तशेंच भारतीय जनता पक्षा खातीर फाल्यांचो दीस हो म्हत्वाचो थारता. गोंयांत सगल्यांत चड काळ भाजप सरकाराचो मुख्यमंत्री म्हूण वावर करपाचो मान डॉ. प्रमोद सावंत हांकांच फावो जाता.

राष्ट्रीय स्वयंसेवक संघाचे वावुरपी आशिल्ले डॉ. प्रमोद सावंत हांची कारकीर्द भारतीय जनता पक्षाच्या युवा मोर्चाच्या अध्यक्षपदा वेल्यान सुरू जाली. आयुर्वेदीक दोतोर म्हूण लेगीत भामय – पाळी हांगा तांणी प्रॅक्टीस केल्या. आयुर्वेदीक दोतोर म्हूण सरकारी नोकरी सोडून ते सक्रीय राजकारणांत देंवले. पाळी मतदारसंघाचे तेन्नाचे काँग्रेस आमदार गुरुदास गांवस हांकां अचकीत आयिल्ल्या मरणाक लागून पाळी मतदारसंघात पोटवेंचणूक जाली.

नोव्हेंबर 2008त जाल्ले हे पोटवेंचणूकेत डॉ. प्रमोद सावंत हे भाजपाचे उमेदवार आशिल्ले. काँग्रेसीचे प्रताप गांवस हांचे कडल्यान डॉ. प्रमोद सावंत पराभूत जाले. पराभवान तांची राजकी कारकीर्द सुरू जाली. हाचे उपरांत सांखळी (पयलीचो पाळी) मतदारसंघातल्यान 2012चे विधानसभा वेंचणुकेंत ते सगल्यांत पयलीं जैतिवंत जाले. 2017चे विधानसभा वेंचणुकेत दुसरे खेपे ते वेंचून आयले. मनोहर पर्रीकार हांच्या फुडारपणा खाला भाजप सरकार सत्तेर येतकूच ते सभापती जाले. सभापती आसतनाच पर्रीकार हांकां आयिल्ल्या मरणाक लागून मुख्यमंत्री जावपाची संद तांकां मेळ्ळी. तांच्याच फुडारपणा खाला 2022 वर्सा विधानसभेची वेंचणूक जावन भाजपाक भोवमत मेळ्ळे. हाका लागून परतून मुख्यमंत्री म्हूण तांणी सोपूत घेतलो. फाल्यां मुख्यमंत्रीपदाची सात वर्सां ते पुराय करतात.