भांगरभूंय | प्रतिनिधी
-अंत्योदय तत्वाचेर काम करपाक मुख्यमंत्री तयारसांखळीः लोकांचें आनी मुख्यमंत्री डॉ. प्रमोद सावंत समिकरण म्हणल्यार खऱ्या ‘अंत्योदय’ तत्वा वयल्या सरकाराची गवाय. दर शेनवारा आनी आयतारा सांखळे जावपी मुख्यमंत्र्याच्या जनता दरबारांत मुख्यमंत्री डॉ. सावंत हांकां मेळपाक तशेंच तांच्या सगळ्या समस्यांचेर एकाच वेळार उपाय सोदून काडपाचो वावर मुख्यमंत्र्यान केलो. मुख्यमंत्र्याच्या ह्या बेगोबेग कृतीक लागून लोकांच्या तोंडार समाधानी हांसो दिसूंक लागलो.
लोकांचे प्रस्न सुटावे करपाचोय मुख्यमंत्री सदांच यत्न करतात. देखूनच ह्या जनता दरबारांत लोकांची गर्दी दिसानदीस वाडत आसा. काल, शेनवार सकाळीं व्हड प्रमाणांत लोकांक मुख्यमंत्र्यानी भेट दिली. हातूंत सांखळी मतदारसंघांतल्या लोकां वांगडा गोंयच्या वेगवेगळ्या वाठारांतलेय लोक हाजीर आशिल्ले.
ह्या जनता दरबारांत जायत्या जाणांनी आपलीं कामां तशेंच कांय कामाचें निवेदन मुख्यमंत्र्याक सादर केले. ह्या लोकांच्या मागणे प्रमाण संबंदीत खात्यांक आनी अधिकाऱ्यांक ‘ऑन द स्पॉट’ सुचोवण्यो मुख्यमंत्र्यान आपल्या ओएसडींक दिल्या.
———–
समस्या मुक्त जाले उपरांत लोकां कडल्यान मेळिल्लो आशीर्वाद सर्वोत्तम खीण
मुख्यमंत्री म्हणल्यार सामान्यांतलो एक मनीस. आनी तांणी सामान्य कार्यकर्तो ते मुख्यमंत्री जावपा मेरेन प्रवास केला. सामान्य लोकांचेय प्रस्न आमकां खबर आसात. हे खातीर आमी सदांच सामान्य लोकां वांगडा रावन लोकांचे प्रस्न सोडोवपाचो यत्न करतात. हातूंतल्यान समस्या मुक्त लोकां कडल्यान मेळपी आशीर्वाद हे जिणेंतले सगळ्यांत बरे खीण. हे खातीर आमी सदांच ह्या लोकांक सहकार दिवपाक तयार आसात अशें मुख्यमंत्री डॉ. प्रमोद सावंत हांणी सांगलें.
मुख्यमंत्री जाले उपरांत सामान्य लोकांचो मुख्यमंत्री म्हूण आपली लोकप्रियता सदांच तिगोवन दवरपी आनी सदांच लोकां वांगडा रावपाक आवडपी मुख्यमंत्री दर शेनवारा आनी आयतारा रवींद्र भवनांत जनता दरबार घेतात. आतां मेरेन लाखांनी लोकांनी ह्या जनता दरबारांत मुख्यमंत्री डॉ. सावंत हांची भेट घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
