भांगरभूंय | प्रतिनिधी
सरकाराचो अनुदानीत शिक्षणीक संस्थांक आदेश; विरोधकांची टिका
पणजी: मुख्यमंत्री गुरुदक्षिणा येवजणे खाला गोंयांतल्या सगल्या अनुदानीत शिक्षणीक संस्थांनी अॅक्सीस बँकेंत खातीं उक्तीं करचीं असो आदेश सरकारान जारी केला. शिक्षण संचालक शैलेश झिंगडे हांणी ते विशींचें परिपत्रक जारी केलां.
अनुदानीत शिक्षणीक संस्थां कडल्यान शिक्षक आनी कर्मचाऱ्यांक वेळार आनी निर्धारीत पगार दिनात अश्यो कागाळी वाडूंक लागले उपरांत मुख्यमंत्री डॉ. प्रमोद सावंत हांणी 2023-34 च्या अर्थसंकल्पीय उलोवपांत मुख्यमंत्री गुरुदक्षिणा येवजण जाहीर केली आनी हे येवजणे खाला अनुदानीत शिक्षणीक संस्थांक अॅक्सीस बँकेंत खातीं उक्तीं करपाचे निर्देश दिवन एकाच वेळार सगल्या संस्थांक ऑनलायन पद्दतीन निधी दिवपाचें थारायिल्लें.
पूण आतां मेरेन खूबश्या संस्थांनी अॅक्सीस बँकेंत खातीं उक्तीं केल्लीं नात. ताका लागून शिक्षण संचालकांक परतून परिपत्रक जारी करून सगल्या अनुदानीत शिक्षणीक संस्थांक अॅक्सीस बँकेंत खातीं उक्तीं करपाचो आदेश जारी केला. गोंयांत सुमार 570 अनुदानीत शिक्षणीक संस्थां आसून शिक्षण खात्याच्या आदेशा प्रमाण ह्या सगल्यांक आतां अॅक्सीस बँकेंत खातीं उक्तीं करचीं पडटलीं
येवजणे खाला सरकारान फक्त अनुदानीत शिक्षणीक संस्थांकूच अॅक्सीस बँकेंत खातीं उक्तीं करपाचे आदेश दिल्यात. ह्या संस्थां मदले शिक्षक आनी हेर कर्मचाऱ्यांक मात ते विशीं कसलीच सक्ती केल्ली ना.
हो तर सरकारी बँको सोंपोवपाचो यत्न: विरोधक
सरकाराच्या ह्या निर्णयाक विरोधी आमदारांनी खर आक्षेप घेतला. विरोधी पक्ष फुडारी युरी आलेमांव हांणी हाचे वेल्यान सरकाराचेर आरोप केलो. गोंय सरकार ह्या निर्णया वरवीं खाजगी बँकांक तेंको दीत आसून सरकारी बँको सोंपोवपाचो यत्न सरकारान आंखिल्ल्याची टिका तांणी केली. आमदार कार्लुस फेरेरा हांणी ह्या निर्णयाक न्यायालयांत आव्हान दितले अशें म्हणलें. जाल्यार अॅक्सीस बँक वेवस्थापनाच्या चेपणाक बळी पडून थंय खातीं उक्तीं करपाचो निर्णय सरकाराक घेतिल्ल्याचो दावो करून, हें परिपत्रक जाता तितले बेगीन फाटीं घेवपाची मागणी गोवा फॉरवर्डाचे उपाध्यक्ष दुर्गादास कामत हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
