भांगरभूंय | प्रतिनिधी
विश्वजीत राणे हांचें स्पश्टीकरण
नंबर 1, नंबर 2 नाशिल्ल्याचो दावो
सरकारी दोतोरांक खासगी प्रॅक्टीस करपाक बंदी
भांगरभूंय । प्रतिनिधी
पणजी : हांगा नंबर एक वा नंबर दोन अशें कांयच ना. मु‘यमंत्री डॉ. प्रमोद सावंत हेच आमचे फुडारी आसात आनी तांच्या खाला आमी सगळे मंत्री आसात. गोंय सुरक्षीत आसा आनी आमचें नातेंय घटमूट आसा. आमचे भितर कसलीच घुस्मट ना, अशें भलायकी मंत्री विश्वजीत राणे हांणी सभाघरांत सांगलें.
भलायकी, शार उदरगत, रानां आनी एफडीए खात्याच्या मागण्यांचेर चर्चा जाली. चर्चे उपरांत ह्या खात्याच्या मागण्यांक सभाघरान मान्यताय दिली.
दोतोर बरो वावर करीत आसले तरी शिस्ती बाबत सरकार कसलीच तडजोड करचें ना. सरकारी दोतोरांक खासगी प्रॅक्टीस करपाक मेळची ना, अशें भलायकी मंत्र्यान सांगलें.
गोंय वैजकी म्हाविद्यालयांत आपत्कालीन वैजकी (इमर्जंसी मॅडिसीन) फांटो स्थापन करपाचो प्रस्ताव आसा. हाका लागून गोंय वैजकी म्हाविद्यालया वयलो ताण उणो जावपाक मजत जातली. गोंय वैजकी म्हाविद्यालय तशेंच भलायकी खात्यांत बदल तशेंच सुदारणा करपा खातीर मुख्यमंत्री डॉ. प्रमोद सावंत हांच्या फुडारपणा खाला समिती स्थापन जातली. हे समितींत भलायकी मंत्री, मुखेल सचीव तशेंच नामनेच्या दोतोरांचो आस्पाव आसतलो. तशेंच उत्तर गोंय आनी दक्षीण गोंयांत दरेकी एक अशें दोन क्रिटीकल कॅर सेंटर स्थापन जातले. कांक्राच्या सुपरस्पेशालीटी हॉस्पिटला खातीर टाटा मॅमोरियल हॉस्पिटला कडेन भागीदारी जातली. गोंयांतली 108 अॅम्ब्युलन्स सेवा बरो वावर करता. अॅम्ब्युलन्सींचो आंकडो आंता 100 चेर पावला. 108 सेवेचेर देखरेख दवरपा खातीर नियंत्रण फांटो स्थापन जातलो. फुकट आयव्हीएफ सेवा सुरू करपी गोंय हें पयलें राज्य आसा. आतां मेरेन 9 भुरग्यांचो जल्म जाला, अशें तांणी सांगलें.
जमीन रुपांतरणाचेर व्हायट पेपर
जमीन रुपांतरणाचेर सरकार व्हायट पेपर (श्वेतपत्रिका) जारी करतलों. हांव मंत्री जावचे पयलीं 1 कोटी 50 लाख चौखण मिटर जमनीचें रुपांतरण जालां. काँग्रेस सरकाराच्या काळांत 9.5 कोटी चौ.मि. जमनीचें रुपांतरण जालां. म्हज्या कार्यकाळांत 16 ते 17 लाख चौ.मि. जमनीचें रुपांतरण जालां, अशें शार उदरगत खात्याचे मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
