भांगरभूंय | प्रतिनिधी
पणजीः आधुनीक डिजिटल तंत्रगिन्यानाच्या आदारान साहित्य जगभर पावोवपाचे यत्न
तोखणायेक पात्र आसात, अशें रंगश्रेष्ठ पुरस्कार जैतिवंत अभिनेते अजित केरकार हाणी सांगलें. सिध्दहस्त साहित्यीक मुकेश थळी हांच्या ऑडीयो बुकाचें अनावरण करतकच राजांगण फोंडें हांगा आयोजीत साहित्य-संग हे कार्यावळींत ते उलयताले.
थळी हांच्या निबंदांत खोलाय, रसाळ शैली आनी वासाळ कोंकणी हांचे वांगडाच संदर्भांची गिरेस्तकाय, विचार, लालित्य, काव्यमय आविष्करण हांचो सुमेळ आसता अशें केरकार हांणी सांगलें. सुभाष जाण हांच्या आवाजांतलो जीवनगंध पुस्तकांतलो कुळागर निबंद आनी रघुनाथ साकोड्डेंकार हांच्या आवाजांतलो मागीलदार हे निबंद आयकतना वेगळीच अनुभूती आयली, पुस्तक आयकप हो कितलो आनंदी अणभव हें कळ्ळें अशें अजित केरकार हांणी सांगलें.
कोंकणी साहित्याच्या मळार अशेच तरेन आनीक प्रयोग जावंक जाय कारण ती काळाची गरज आसा आनी मुकेश थळी हाणी ही देख घालून दिल्या अशें केरकार हाणी सांगलें. केरकार हांचे हस्तुकीं यू ट्युबा वेल्या ध्वनीमुद्रीत साहित्याचें अनावरण जालें. मुकेश थळी – कोंकणी साहित्य ऑडियो बूक ह्या नांवान यू ट्यूब उगडल्यार हे निबंद वाचूंक मेळटात.
आनीक कांय वेंचीक निबंद रोखडेच अपलोड करतले, अशी माहिती मुकेश थळी हांणी दिली. रघुनाथ साकोड्डेंकार आनी सुभाष जाण हांणी ह्या वेळार आपलें मनोगत व्यक्त केलें. वाद्यसंगिताची जोड शब्दा फाटल्यान आसतकच ताचें सादरीकरण मुल्य वाडटा अशें साकोड्डेंकार हांणी सांगलें.
मुकेश थळी हांच्या नवप्रयोग, सृजनकला हांची तोखणाय करीत तितली थोडी अशें उपक्रमाची तोखणाय करतना सुभाष जाण हांणी सांगलें. नंदिनी थळी हांणी उपकार मानले. ह्या वेळार इन्स्टिट्यूट मिनेझीस ब्रांगाझा संस्थेचे अध्यक्ष दशरथ परब, डॉ. विद्या प्रभुदेसाय, कवी उदय म्हांबरो, पत्रकार संजय बोरकार आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
