भांगरभूंय | प्रतिनिधी
पणजीः कोंकणी साहित्यीक, अनुवादक, कोशकार मुकेश थळी हांकां तांच्या ‘रंगतरंग’ ह्या कोंकणी पुस्तका खातीर साहित्य अकादेमी पुरस्कार फावो जाला.
पणजी आकाशवाणी केंद्रांतल्यान 30 वर्सां वृत्तनिवेदक म्हणून काम करून थळी पोरूं निवृत्त जाले. तांणी आपल्या खाशेल्या आवाजान कोंकणी खबरांक उंचाय दिली. कोंकणी, मराठी, इंग्लीश भाशांनी ते नेमान स्तंभलेखन करतात.
वळेसर, हंसध्वनी, अक्षरब्रह्म, जीवनगंध, रंगतरंग हें तांचे निबंधझेलेह प्रकाशीत आसात. दोरेमीफा, सारेनीसा ह्या प्रकाशीत पुस्तकांक कला अकादमी कोंकणी नाटक सर्तींत बरोवपा खातीर पयलें इनाम मेळ्ळें. तें कोंकणी- इंग्लीश शब्दकोशाचे सहरचनाकार आसात आनी गोंय विद्यापिठाच्या कोंकणी विश्वकोश विभागांत संशोधन सहाय्यक म्हणून स वर्सां काम केलां.
थळी हांणी सुमार 50 कोंकणी कथा इंग्लिशींत अणकारीत केल्यात. तांणी कथा, कविता, एकांकिका, असंख्य गितां आनी नाटकां बरयल्यात. सुत्रसंचालक आनी मुलाखतकार म्हणून तांकां खासा वळखतात. साहित्य आनी पत्रकारितेच्या मळार जायत्या पुरस्कारांनी तांचो भोवमान केला. तांकां गणीत विशयाची बरी जाणविकाय आसा आनी तांणी त्याच विशयांतल्यान पदवीय पुराय केल्या. संगीता विशीं गिन्यान आनी आवड आसा.
पुरस्कार फावो जाल्ल्या ‘रंगतरंग’ ह्या पुस्तकांत 20 ललीत निबंध आसात. तातूंत श्रावण आनी हेर सैमाचीं चित्रां, व्यक्ती चित्रां, पावस, विचार अशा वेगवेगळ्या विशयांचेर आदारीत निबंधांचो आस्पाव आसा.
मुकेश थळी हांकां पुरस्कार फावो जाल्ले खातीर कोंकणी मळा वयल्या जायत्या मानेस्तांनी तांकां परबीं भेटयल्यांत.
तूं असो निसर्गप्रेमी. व्रतस्थ. मायेस्त. केन्ना कोणा कडल्यान कसली अपेक्षा दवरिनासतना मान सकयल घालून आपलें साहित्य साधनेचें व्रत आचरणांत हाडपी. काळजान गोड. वात्सल्यान भरिल्लो. संगिताच्या तालार लयबद्ध साहित्याचें रंग उधळीत मनीसपणाचें तरल तरंग अणभवपाचे कसब तूंच करूंक जाणां. तुजें वाचन, तुजें उतरां वयलें प्राबल्य, तुजी कले वयली निश्ठा आनी तुजे लिखणेचें तेज ह्या सगळ्यांचो आयज गौरव जाला. आमकां इश्टांक तुजो सदांच अभिमान. साहित्य अकादेमी पुरस्कारान तुज्या आयज मेरेनच्या साहित्य साधनेचो योग्य गौरव जाला.
– उदय म्हांबरो, संजीव मित्रमंडळ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
