भांगरभूंय | प्रतिनिधी
बांदोड्यां ‘शिवरजंनी’ निबंद संग्रहाचें प्रकाशन
पणजी: प्रज्ञा आनी प्रतिभेचे उपजत देणें आशिल्ले भोव भाशीक लेखक मुकेश थळी हांच्या साहित्यांत विशयांची बरीच मोटी विविधताय आसता. तांच्या निबंदांत, नाटकांत नवे नवे शैलीचे, विशयांचे, आशयाचे प्रयोग दिसून येतात अशें नामनेचे रंगकर्मी अजीत केरकार हांणी सांगलें. थळी हांच्या शिवरंजनी ह्या कोंकणी निबंद संग्रहाच्या प्रकाशना वेळार ते बांदोड्यां महालक्ष्मी संस्थान सभाघरांत जाल्ले कार्यावळींत उलयताले. थळींच्या साहित्यांत कोंकणी भाशेचो जो दिश्टावो घडटा ताचो अभ्यास तरणाटे पिळगेन करपाक जाय. एकदां हातांत घेतकच तांचें साहित्य सकयल दवरीन दिसना अशेंय केरकार हांणी म्हळें. आनंद, विचार, संदेश अशे भोव आयामी स्तर तांच्या साहित्यांत दिसतात, अशें केरकार हांणी सांगलें. साहित्याची साधना करतना थळी कसलीच वान्सा नासतना, पुरस्कार, पदां हांचो मोह लोभ दवरिनासतना निर्मिती करीत आसतात अशें केरकार हांणी म्हळें.
संजना पब्लिकेशन्स आनी श्रीनागेश प्रासादीक नाट्य समाज हांच्या जोड पालवान ही कार्यावळ जाली. कवी संजय बोरकार हांणी पुस्तकाचेर उलाेवप करतना 24 निबंदांतले सगलेच निबंद प्रभावी आसात अशें सांगलें. कुळागर, पुरुमेंत, फटासकार ह्या निबंदांची खाशेलपणां तांणी सांगलीं. लेखक मुकेश थळी हांणी आपल्या लेखनाचें मर्म आनी अर्क सांगतना लेखना वरवीं आपणाक आनंद मेळटा अशें सांगलें. मनीसपण पयलीं, ताची साधना आदीं आनी उपरांत लेखकपण असो आपलो विचार तांणी मांडलो.
महालक्ष्मी संस्थानचे भांडारी गिरीश उजगांवकर हांणी आपल्या उलोवपांत थळी हांच्या लेखनांत खोलाय, उंचाय आसता अशें सांगलें. नामनेचे रंगकर्मी रघुनाथ सांकोड्डेंकार हांणी आपल्या सुटसुटीत निवेदना वरवीं कार्यावळींत गोडसाण हाडली. संजना पब्लिकेशन्साचे दिनेश मणेरकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
