भांगरभूंय | प्रतिनिधी
मुकेशबाब हें कोंकणींतलें एक सोबीत रसायन. देवान कोंकणीक दिल्लें एक देणें. साहित्यीक, अनुवादक, कोशकार आनी पत्रकार.
मुकेशबाब पिरायेच्या धा वर्सां सावन बरयता. तांची घडण रवींद्रबाब केळेकारांच्या घरांत तांच्या मार्गदर्शनाखाला जाली. मुकेशबाबालें बरप तेन्ना कोंकण भारती नेमाळ्यांत येतालें. मागीर राष्ट्रमत दिसाळ्यांत तांचें वेगवेगळे तरेचें बरप वाचूंक मेळ्ळें. तातूंत कोंकणी आनी मराठी दोनूय तरांचें आसलें.
मुकेशबाबान ल्हान पिरायेचेर उजवाड, वावराड्यांचो इश्ट ह्या नेमाळ्यांनी बरोवप केलां. डीट पानार उजवाडाचेर लेख बरयल्यात. तेन्नाचे संपादपी एव्हाग्रियु ज्यॉर्ज हांणी मुकेशबाबाची तुस्त केल्ली आनी आपलीं बुकां दिवन ताचेर बरयल्लें – नदर लागूं येता इतलो ताकदी तूं बरयतां. मुखार आसिनाद केल्ली. वावराड्यांचो इश्ट नेमाळ्याचेर मुकेशबाबाच्यो कविता छापून येताल्यो. तेन्ना एन्थनी कुर्रै पियेंकार आनी हेर कवी सक्रीयपणान बरयताले. मुकेशबाबाची फादर ए पेरेरा सदांच तोखणाय करून तांकां उर्बा दिताले.
मुकेशबाबाली डिग्री गणीत विशयांतली. गणितांत मुदयेर थीक कशें मुद्द्याक धरून बरोवप जाता तशें तांचें खबरांचें बरप. तांचो जीव गणीत शिकोवपांत रमलोना. ते तेन्ना गोवा विद्यापीठांत कोंकणी विश्वकोश विभागांत संशोधक म्हूण रूजू जालें. स वर्सां तांणी थंय जो वावर केलो तातूंत तांकां विश्वकोशांतली नोंद कशी बरोवप, तो मजकूर कसो आटोवप आनी ल्हान करप, संपादन कशें करप ह्या गजालींची बरे तरेन जाण मेळ्ळी. थंय मुखेल संपादक आशिल्ले डॉ मनोहरराय सरदेसाय. तांच्या मार्गदर्शनाखाला मुकेशबाबाक पत्रकारिता, संशोधन, साहित्य हांचे बरे धडे शिकूंक मेळ्ळे. हांगां स वर्सांत तांच्या बुदवंतकायेचें भांगर जालें म्हणल्यार अतीताय जावं नजो.
गोंय विद्यापीठांत आसतना मुकेशबाब आकाशवाणी पणजी केंद्राचेर केन्नाय न्यूज वाचूंक वताले. तांचो आवाज वजनदार. भारी पेजाद आनी आवाज (ताळो) गोड. मुकेशबाबान आपल्या ह्या ताळ्यान आकाशवाणीच्या प्रादेशीक खबरांक एक उंचाय दिली. कोंकणी खबरांक एक घटमूट बसका दिली. तांच्यो जानोत खबरो गोंयभर लोक घोस्तान आयकूंक आशेताले. रेडियो पत्रकारितेची मुकेशबाबाली सेवा हांगाच सुरू जाली.
ते विद्यापीठांत काम करता आसतनाच, रेडीयोचेर ’न्यूज रीडर’ पदाची कायम नोकरी जाली. मुकेशबाब ते परिक्षेंत पयले आयले. थंय लेखी, मागीर आवाजाची चांचणी आनी मागीर मुलाखत अशी तीन पांवड्याची परिक्षा आशिल्ली. आदीं थंय काम केल्ल्यान तांकां बातम्यो अणकारपाची प्रॅक्टीस आशिल्ली. रेडियो न्यूजाचें बेस बरें गिन्यान तांणी जोडिल्लें. ताका लागून तांकां पयलो नंबर घेवपाक सोंपें जालें. विद्यापीठ सोडून मुकेशबाब 1993 वर्सा रेडीयोच्या न्यूज विभागांत रूजू जाले.
मागीर मुकेशबाबालो ताळो लोकांक डेली आयकूंक मेळपाक लागलो. थंय तांकां वाव मेळ्ळो. मिडिया, रेडियो पत्रकारिता आनी खबरो वाचप ह्या मळार ते एकेक पावल मारीत मुखार वचत रावले. देशभरांतले वडील रेडीयो न्यूज अधिकारी पणजेंत येताले तेन्ना बसकां वेळार मुकेशबाबान तांचे कडल्यान प्रस्न विचारून नवें नवें शिकून घेवचें. तांचे कडेन ही विद्यार्थी नदर अजूनय कायम आसा. तांच्या ताळ्यांतल्यान कोंकणी मराठी हिंदी आनी इंग्लीश व्हॉयस ओवर रेडीयो वेल्यान वितरायले. हिंदी इंग्लीश खबरां बायट तांच्या आवाजांतल्यान भारतभर वचपी बुलेटिनांतल्यान लोकांच्या कानार पडपाक लागले. मुकेशबाबाक हांगा जायते रेडीयो न्यूज अधिकारी इश्ट म्हणून मेळ्ळे. हेर वाठारांतल्यान पणजे केंद्रार येवपी अधिकारी मेळ्ळे. तांचें विश्व वाडत गेलें.
हें सगळें करतना मुकेशबाबालें खबरांपत्रां नेमाळीं हांच्यांतले बरप चालूच आशिल्लें. तांणी नवहिंद टायम्सा खातीर वेगवेगळ्यो मुलाखती घेतल्यो. तातूंत संगीतकार, तियात्रीश्त, लेखक हांचो आसपाव आशिल्लो. सुमार 55 कोंकणी कथा तांणी इंग्लीशींत केल्यो. त्यो नवहिंदार आनी हेर नेमाळ्यांत छापून आयल्यो. कोंकणी, मराठी आनी इंग्लीश ह्या दिसाळ्यांतलें नेमाळ्यांतलें तांचें वेगवेगळे तरेचें बरप चालूच आशिल्लें.सुनापरान्त दिसाळ्यांत तांणी विज्ञान हो स्तंभ खूब तेंप बरयला. खेरीज हेर वेगवेगळे तरेचे लेख आयतारच्या अंकांतले पुरवणी खातीर बरयल्यात. जाग, कोंकण टायम्स आनी बिंब दिसाळ्या खातीर तांणी लेख आनी निबंद बरयल्यात.
भांगरभूंय दिसाळ्यांत तर पावसाच्या घोग्यांवरी ते बरयत आसतात. ताचेर तांचो पत्रकारिता उतरावळ हो स्तंभ (कलम) येता. गुलाब नेमाळ्यांत तांचो हो कलम नेमान येता. ताचेर पुस्तक येवपाचें आसा. ताचो आदार कोंकणी नेमाळीं, रेडीयो, टीव्ही आनी हेर माध्यमांक जातलो. हातूंत मुकेशबाबाल्या जिवितभराच्या अणभवाचें सार दिसता.
रेडीयोचेर आसतना मुकेशबाबान जायत्या जाणांच्यो मुलाखती घेतल्यात. तातूंत कांय लायव्ह मुलाखतींचो लेगीत आसपाव आसा. एलेसांवा वेळार वेचणूक अधिकारी आसूं वा क्रिकेटर आसूं वा लेखक आसूं ताणी कितल्यो मुलाखती घेतल्यात तांची मेजणी करूं नजो.
पत्रकार परिशदांतल्यान आपणाक जायत्यो नव्यो गजाली शिकपाक मेळ्ळ्यो अशें मुकेशबाबान एकदां म्हाका म्हणिल्लें. लालकृष्ण अडवाणींची पणजेंतली पत्रकार परीशद आसूं वा राजकी पक्षांचे फुडारी वा संगीत, आध्यात्म मळावेले फुडारी आसूं आपणाक शिकपाक मेळ्ळें अशें तें सांगता. राष्ट्रपती, उपराष्ट्रपती, प्रधानमंत्री, जुविज अशा मानेस्तांच्या कार्यावळींची कवरेज करतना कितलें शिटूक आसचें पडटा आनी बेगीबेगीन दिल्लीक इंग्लीशींत बातमी धाडची पडटा ताचीय खबर मुकेशबाब उमेदीन सांगता.
बीबीसीचे प्रतिनिधी मार्क तुली, इंग्किश माध्यमांचे पत्रकार श्याम लाल,
कुशावत सिंग आनी हेर हिंदी मराठी पत्रकारांचीं पुस्तकां वाचून आपूण कसो मेच्युअर जायत गेलों तें मुकेशबाब नमळायेन सांगता.
मुकेशबाबान टीव्ही, रेडीयो,
खबरांपत्रांत जायत्या तरणाट्या न्यूज रिडरांक ट्रेनिंग दिवन घडयल्यात. वेगवेगळ्या संस्थांच्या खबरां लेखन आनी वाचन कार्यशाळांनी तांणी मार्गदर्शन केलां. अणकारांत तांचो हात धरपी गोंयांत कोण ना. गती आनी अचूकताय हें तांचें खाशेलपण.
मुकेशबाबाक कोंकणी भाषा मंडळाचे पत्रकारिता तशेंच स्तंभलेखनाचे अशे दोन पुरस्कार मेळ्ळ्यात. गोवा चेंबर ऑफ कॉमर्स आऩी इंडस्ट्रीन रेडीयो जर्नलीझमचो
खास पुरस्कार दिवन मुकेशबाबाचो भोवमान केला.
लोकमत दिसाळ्यान तांकां गोअन ऑफ द इयर भोवमान दिला. तांचें साहित्यांतलें तशेंच लेख बातम्यांचें नियाळांचें बरप लोकांच्या काळजाक खोल हात घालता. विशय
वेगवेगळे पूण जिणेंतले म्हत्वाचे घेवन मुकेशबाब ताची फोडणीशी विस्कटावणी करता. ताणी फुडारांतूय अशीच सेवा करून कोंकणीक गिरेस्त करची अशी मुकेशबाबाक विनंती करून तांकां बरी भलायकी आनी शांती आंवडेतां.
सखाराम शेणवी बोरकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
