भांगरभूंय | प्रतिनिधी
मुंबय, खबरां संस्था ः कासरा सावन छत्रपती शिवाजी महाराज टर्मिनस (सीएसएमटी) वचपी लोकलांतल्यान पडून पांच प्रवाशांक मरण आयलें. जाल्यार तिग जाण गंभीर जखमी जाल्यात. सोमारा सकाळीं सुमार णव वरांचेर दिवा आनी कोपर रेल्वे स्टेशनां मदीं हो अपघात जालो.
चड म्हायती प्रमाण, मुंबय वटेन येवपी लोकलांत सदचे भशेन गर्दी आशिल्ली. मुंब्रा लागसार आशिल्ली लोकल गाडी आनी मुखारल्यान येवपी मुंबय-लखनौ पुष्पक एक्सप्रेस एकामेकांक सामकी लागच्यान गेली. दारांत उबे आशिल्ले प्रवाशी आनी तांचीं बॅगा एक्सप्रेस गाडयेक घासली आनी तांचो तोल वचून आठ प्रवासी लोकलांतल्यान सकयल पडले अशें प्रत्यक्षदर्शींनी सांगलें. हे घडणुकेंत पांच जाणांक थंयच मरण आयलें, जाल्यार तिग जाण जखमी जालें.
अपघाताची म्हायती मेळटाच प्रवाशांनी रोखडेच आरपीएफ आनी रेल्वे प्रशासनाक म्हायती दिली. रेल्वे पुलीस आनी सुरक्षा दळ रोखडेंच घडणूक सुवातेर पावलें. जखमींक उपचारा खातीर कळवा आनी ठाणेच्या छत्रपती शिवाजी महाराज हॉस्पिटलांत दाखल केल्यात. तांचेर उपचार चलतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
