भांगरभूंय | प्रतिनिधी
मुंबय, खबरां संस्था: मुंबयच्या उच्च न्यायालया सयत वांद्रे, किल्ला कोर्ट आनी राज्याची उपराजधानी आशिल्ल्या नागपुरच्या जिल्लो न्यायालयाक बॉम्ब घालून उडोवपाची धमकी बिरेस्तार ता. १८ डिसेंबराक दिली. हे धमकेक लागून पुराय राज्यांत बरोच बोवाळ निर्माण जालो. एका ई-मेला वरवीं ही धमकी दिल्ल्यान पुलीस आनी सुरक्षा यंत्रणांची धांवपळ जाली. बेगोबेग न्यायालयां रिकामी करून बॉम्बशोधक पंगडा वरवीं (बीडीडीएस) नेटान तपासणी करपाक सुरवात केल्या.
मुंबय पुलिसांच्या सुत्रांनी दिल्ले म्हायती प्रमाण, मुंबय उच्च न्यायालयाचे अधिकृत वेबसायटीचेर एक धमकेचो ई-मेल आयलो. हातूंत फकत उच्च न्यायालयूच न्हय, तर ‘मुंबयचीं सगलीं न्यायालयां बॉम्ब घालून उडयतले’, अशी मेल आशिल्ली. हातूंत मुखेलपणान वांद्रे आनी किल्लो कोर्टाचोय उल्लेख आशिल्ल्याचें समजता. ही म्हायती मेळटांच परिस्थितीची गंभीरपणां लक्षांत घेवन, पुलिसांनी दनपरां सुमार एका वरांचेर बेगोबेग उच्च न्यायालयाची इमारत रिकामी केली. तशेंच वांद्रे न्यायालयांतलोय कामकाज स्थगीत करून वकील, कर्मचारी आनी पक्षकारांक सुरक्षीत भायर काडले. अंधेरी न्यायालयांत बॉम्ब आशिल्ल्याची धमकी मेळ्ळी. सुरक्षेच्या कारणाक लागून बेगोबेग पुराय न्यायालय वाठार रिकामो केलो. सध्या न्यायालयाच्या वाठारांत वचपाक बंदी घाल्या. भितरल्यान कोणाकूच भायर वचपाक आनी भायल्यान कोणाकूच भितर येवपाक मनाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
