भांगरभूंय | प्रतिनिधी
विमानतळार एनआयएन केली अटक , 15 वर्सांनी प्रत्यार्पणनवी दिल्लीः मुंबयंत 2008 वर्सा देशाक हालोवपी 26/11 च्या आतंकवादी हल्ल्यांतलो मास्टरमायंड तहव्वूर राणा हाचें अमेरिकेंतल्यान भारतांत प्रत्यार्पण केलां. ताका हाडपी खाशेलें विमान बुधवारा दिल्लीच्या पालम ट्रॅफीकल विमानतळार देंवलें. विमानतळार पावतकच एनआयएन ताका अटक केली. वट्ट 15 वर्सांनी राणा हाचें प्रत्यार्पण केला.
राणा हाका थेट एनआयएच्या मुखेल कार्यालयांत व्हेलाे आनी उपरांत वैजकी तपासणी करून पटियाला हाऊस कोर्टांत हाजीर केलो. ताका तिहार बंदखणीच्या उच्च सुरक्षा वॉर्डांत दवरपाची शक्यताय आसा. एनआयए आनी रॉच्या संयुक्त पंगडान राणा हाका भारतांत हाडला. सध्या एनआयएच्या कार्यालया भायर खर सुरक्षा दवरल्या.
प्रत्यार्पणाच्यो अमेरिकेच्यो अटी आनी शर्ती?
भारत आनी अमेरिके मदीं 1997 वर्सा प्रत्यर्पण कबलात जाल्ली. तातूंतल्या नेम, अटी आनी अटी प्रमाण राणा हाचें प्रत्यार्पण केला. ही कबलात दोनूय देशांमदल्या कायदेशीर सहकार्याचें प्रतीक आसा. प्रत्यार्पण नेमांत प्रत्यार्पण करपी व्यक्तीच्या हक्कांचो आदर करचो पडटा अशें म्हळां. देखून राणा हाचें प्रत्यार्पण केले उपरांत भारताक कांय अडचणींक तोंड दिवचें पडटलें. हाचे वांगडाच कांय जापसालदारक्योय पाळच्यो पडटल्यो.
ज्या गुन्यांवांत प्रत्यार्पण जाला, त्याच प्रकरणांत खटलो
भारत-अमेरिका प्रत्यार्पण कबलातींत एकमेवतायेचो नेम आसा. तेंच ह्या कबलातीचें म्हत्वाचें आंग. ज्या गुन्यांवाक लागून ताका प्रत्यार्पण केला, त्याच गुन्यांवांत राणाचेर खटलो वा ख्यास्त जातली. भारत सरकार ताका हेर खंयच्याच प्रकरणांत ख्यास्त दिवंक शकना. हाका लागून राणाच्या हक्कांची राखण जाता आनी भारताक आपले कृतीचेर मर्यादा घालची पडटली.
हेर देशांच्या ताप्यांत दिवपाक मेळना
अमेरिकेंतल्यान भारतांत हाडिल्ल्या राणाक अमेरिकेचे परवानगे बगर तिसऱ्या देशाक दिवंक मेळना. प्रत्यार्पण करचे पयलीं केल्ल्या गुन्यांवाक लागून राणाक तिसऱ्या देशांत धाडूंक मेळना. आंतरराष्ट्रीय पांवड्यार आपली विस्वासपात्रताय तिगोवन दवरपा खातीर भारताक ही अट पाळची पडली.
निस्पक्ष सुनावणेचो अधिकार
प्रत्यार्पण केल्या उपरांत राणाक भारतांत निस्पक्ष खटलो चलपाचो अधिकार मेळटा. ही फकत एक औपचारिकताय न्हय, जाल्यार भारतीय कायद्याचो आनी आंतरराश्ट्रीय मानवी हक्कांचोय एक गरजेचो भाग. राणा कडेन कसलोच पूर्वग्रह ना आनी कायदेशीर प्रक्रिया पारदर्शक उरची हाची खात्री भारताक करची पडटली. हो नेम भारताच्या न्यायवेवस्थेचेर व्हड जापसालदारकी घालता.
न्यायालयान याचिका न्हयकारिल्ली
तहव्वूर राणा हाका भारतांत धांवडावन घालचे न्हय हे खातीर अमेरिकेच्या सर्वोच्च न्यायालयांत याचिका दाखल केल्ली. तातूंत ताणें आपणाक पार्किन्सन दुयेंस आसा असो दावो करून भारतांत आपणाक त्रास दितले असो युक्तिवाद केलो. पूण न्यायालयान ताची याचिका न्हयकारली.
2009 वर्सा एफबीआयन केल्ली अटक
राणा हाका 2009 वर्सा अमेरिकेंतल्या एफबीआयन अटक केल्ली. ताचेर लश्कर-ए-तयबा ह्या आतंकवादी संघटणेक तेंको दिल्ल्याचो आरोप आशिल्लो, तशेंच मुंबय हल्ल्यांत वांटो घेवपी डेव्हीड हेडली हाका आदार दिल्ल्याचो आरोप आशिल्लो. अटक जाले उपरांत ताका लॉस एन्जेल्सच्या डिटेन्शन सेंटरांत दवरिल्लो.
26/11 हल्ल्यांत 175 जाणांक मरण आयिल्लें, 300 वयर जाल्ले जखमी
26 नोव्हेंबर 2008 दिसा 10 लश्कर-ए-तयबा आतंकवादी करमाळा वरवीं दर्या मार्गान मुंबयंत पावले आनी ताज हॉटेल, सीएसटी स्टेशन, लियोपोल्ड कॅफे, नरिमन हाऊस ह्या सारक्या सुवातींनी बेपर्वा गोळीबार आनी स्फोट केले. ह्या हल्ल्यांत 175 नागरीकांक मरण आयिल्लें आनी 300 परस चड लोक जखमी जाल्ले.
गृह मंत्रालयांत उच्च पांवड्या वेली बसका
तहव्वूर राणा भारतांत आयल्या उपरांत गृहमंत्री अमीत शाह, परराश्ट्र मंत्री एस. जयशंकर आनी सुरक्षा सल्लागार अजीत डोभाल हांचे हाजिरेंत उच्च पांवड्या वेली बसका जाली. हातूंत राणा हाची चवकशेची रुपरेखा, सुरक्षा उपाय, फुडारांतली कायदेशीर प्रक्रिया हाचेर चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
