भांगरभूंय | प्रतिनिधी
इंडीयन सुपर लिगेंत (आयएसएल) काल जाल्ले मॅचींत मुंबय सिटीन येजमान केरळा ब्लास्टर्साक 2-0 असो हारयलो. निकाल जरी मुंबय सिटी वटेन लागलो आसलो तरी केरळा ब्लास्टर्सान आपल्या खेळान फुटबॉल चाहत्यांची मनां जिखलीं.
केरळा ब्लास्टर्सान जैता खातीर केल्ले यत्न तोखणाय करपा सारके आशिल्ले. पूण, मुंबय सिटीचो डिफॅन्स ताका भेदपाक जमलो ना. कांय गोल हे गोल पोस्टाक आपटून फुकट गेले. मुंबय सिटीन 2019-20त केरळा ब्लास्टर्साच्या मैदानाचेर एकूच जैत जोडिल्लें. ते उपरांत आतां जिखलो. मेहताब सिंगान 21व्या मिनटाक आनी जॉर्ज डियाझान 31व्या मिनटाक गोल करून मुंबय सिटीक 2-0 अशा फरकान जैत मेळोवन दिवपाक मजत केली.
दोनूय पंगडांनी आक्रमक सुरवात केली. दुसऱ्याच मिनटाक केरळा ब्लास्टर्साच्या दिमित्रीओस डिएमांटाकोस बॉल मुंबय सिटीच्या पॅनल्टी क्षेत्रांत घेवन गेलो. पूण, निमाणो टच दिवपाक तो अपेशी थारलो. केरळाक मुंबय सिटी कडल्यान रोखडेंच प्रत्युत्तर मेळ्ळें आनी ह्या वेळार केरळाच्या डिफॅण्डरांनी मुंबयक आडायलो.
ते उपरांत मुंबय सिटीन मॅचीचेर आपलो शेक दवरलो आनी पयलो गोल 21व्या मिनटाक केलो. ह्या गोला उपरांत मुंबय सिटीचो आत्मविस्वास वाडलो आनी ह्या नेटार ताणें 31व्या मिनटाक दुसरो गोल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
