भांगरभूंय | प्रतिनिधी
उल्हासनगर, खबरां संस्था: देशांत गुन्यांव आनी गुन्यांवकार वाडतूच आसात. बारीक कारणांक लागून लागींच्या मनशांचो दिसा उजवाडे खून जावपाच्यो घडणुको घडटात. उल्हासनगर- कल्याण (मुंबय) एक भिरांकूळ घडणूक घडली. तीग इश्टांनी आपल्या लागींच्या इश्टाचो जीव घेतलो. सोरो उणो दिल्ल्याच्या रागान ही घडणूक घडली. ह्या प्रकरणांत पुलिसांनी तीग दुबावितांक अटक केल्या.
वाडदिसाचे पार्टेक सोरो उणो दिल्ल्याची तिडक तांणी मनांत दवरिल्ली. उपरांत इश्टाच्या घरा वचून ताका बरोच बडयलो आनी चवथे माळये वयल्यान सकयल धुकलून उडयलो.
कार्तिक वायाळे ह्या तरणाट्याचो वाडदीस आशिल्लो. तेन्ना ताणें इश्टांक पार्टी दिल्ली. पार्टेक सोरो उणो दिल्ल्यान कार्तिकाचो इश्ट निलेश आनी ताचें झगडें पेटिल्लें. तेन्ना कार्तिक हांणी निलेशाचे तकलेर बियरीची बाटली फोडिल्ली. ह्या झगड्याचो राग मनांत धरुन निलेश क्षीरसागर, सागर काळे, धीरज नंदकुमार यादव ह्या तिगांयनी कार्तिका आड कट रचलो.
कार्तिक रावता ते इमारतींत ते तिगूय गेले. कार्तीक न्हिदिल्ल्या बेडरूमांत वचून ताका त्या तिगांयनी बरोच मारलो. उपरांत बेडरुमांतल्या जनेलांतल्यान सकयल उडयलो. वयल्यान सकयल पडिल्ल्यान कार्तीक जखमी जालो. ताका हॉस्पिटलांत दाखल केलो. मात तो मेरेन ताका मरण आयिल्लें.
कार्तिकच्या मरणा विशीं सुरवातेक पुलिसांनी अकस्मात मरण आयिल्ल्याची नोंद केल्ली. उपरांत खोलायेन तपास करून कार्तिकाचो खून जाल्ल्याचें स्पश्ट जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
