भांगरभूंय | प्रतिनिधी
इंडीयन प्रिमीयर लिगेची (आयपीएल) 48वी मॅच येजमान लखनौ सुपर जायण्ट्स आनी मुंबय इंडियन्स ह्या पंगडां मदीं हांगाच्या अटल बिहारी वाजपेयी मैदानाचेर जातली.
दोनूय पंगडां मदीं अजून मेरेन चार मॅची जाल्यात, आनी हातूंतल्यो तीन मॅची लखनौन जिखल्यात. पोरूं ह्या मैदानाचेर हे दोनूय पंगड एकामेका आड खेळिल्ले, त्या वेळार लखनौ सुपर जायण्ट्सान पांच धांवड्यांनी उमळशीक वाडोवपी जैत मेळयिल्लें.
गुणतकट्याचेर नदर मारली जाल्यार लखनौ णवांतल्यो पांच मॅची जिखून पांचवे आनी मुंबय इंडियन्स तीन जैता सयत णववे सुवातेर आसा.
आयपीएलाच्या इतिहासांत सगल्यांत चड विकेटी घेवपाचे वळेरेंत पयल्या पांचांनी आस्पाव आशिल्ल्या अमित मिश्राक फकत एकूच मॅच खेळपाची संद फावो जाल्या. राजस्थान रॉयल्सा आड खेळिल्ले फाटले मॅचींत तो इम्पॅक्ट प्लेयर म्हणून मैदानांत देंवलो आनी ताणें रियान परागाची म्हत्वाची विकेट घेतली. आयज मुंबय इंडियन्सा आड ताका निमाण्या इकरांत सुवात मेळुये. हाचें मुखेल कारण म्हणल्यार रोहीत शर्मा आड ताचो टी-20 रॅकॉर्ड उत्कृश्ट आसा. ताणें रोहीताक सात खेपे बाद केला. जाल्यार रोहीतान ताच्या आड फकत 95.6चे स्ट्रायक रेटीन धांवड्यो केल्यात. हाचे खेरीत अमित मिश्रान मुंबय इंडियन्साचो मुखेली हार्दीक पांड्याक लेगीत नाकापुरो केला. ताका ताणें दोन खेपे बाद केला. हार्दीकान ताच्या आड फकत 64.28चे स्ट्रायक रेटीन धांवड्यो केल्यात. अमित मिश्राक सुर्यकुमार यादवा आड सादूर रावपाची गरज आसा. सुर्यान ताच्या आड 212चे स्ट्रायक रेटीन धांवड्यो केल्यात. तशेंच अमितान ताका एकदा लेगीत बाद करूंक ना.
लखनौचो आनीक एक लेग स्पिनर रवी बिश्नोईचें अंदूंच्या हंगामांतलें प्रदर्शन अजून मेरेन खाशेलें अशें जावंक ना. तशेंच राष्ट्रीय टी-20 पंगडांत लेगीत ताची निवड जावपाची शक्यताय सामकी उणी जाल्या. पूण, मुंबय इंडियन्सा आड तो पुनरागमन करपाक शकता. हाचे फाटलें मुखेल कारण म्हणल्यार मुंबय इंडियन्सा आड ताचो रॅकॉर्ड उत्कृश्ट आसा. ताणें ईशान किशन आनी सुर्यकुमार यादव हांकां दरेकी तीन खेपे आनी रोहीत शर्मा आनी टिम डॅव्हिडाक दोन खेपे बाद केला. मोहम्मत नबीक लेगीत ताणें एकदा बाद केला. पूण, हार्दीक आनी तिलक वर्मान ताच्या आड वळेरेन 220 आनी 190चे स्ट्रायक रेटीन धांवड्यो केल्यात. जाल्यार तांकां एकदा लेगीत बाद करपाक बिश्नोईक जमूंक ना.
दुसरे वटेन चेन्नय सुपरकिंग्सा आड शेंकडो मारून फॉर्मांत येवपाचे संकेत दिवपी मार्कस स्टॉयनीसाक आडावपाची तांक मुंबय इंडियन्साचो फास्ट बॉलर जसप्रीत बुमरा कडेन आसा. बुमरान ताका चार खेपे बाद केला. जाल्यार स्टॉयनीसान ताच्या आड फकत 93चे स्ट्रायक रेटीन धांवड्यो केल्यात. बुमरान लोकेश राहुल, निकोलस पुरन आनी देवदत्त पडिक्कल हांकां दरेकी दोन खेपे बाद केल्यात. दुसरे वटेन राहुलाक सोडलो जाल्यार हेरांनी बुमरा आड 100चे स्ट्रायक रेटीन धांवड्यो केल्यात.
अंदूं 42चे सरासरीन आनी 144चे स्ट्रायक रेटीन 378 धांवड्यो करून संवसारीक टी-20 सर्ती खातीर राष्ट्रीय पंगडांतली आपली सुवात घट करपाची ही निमाणी संद आसा. तो हे मॅचींत उत्कृश्ट बॅटींग लेगीत करपाक शकता. हाचें फाटलें मुखेल कारण म्हणल्यार मुंबय इंडियन्सा आड चडश्या बॉलरां आडचो ताचो रॅकॉर्ड उत्कृश्ट आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
