भांगरभूंय | प्रतिनिधी
मानखुर्द, खबरां संस्था: मुंबय पुलिसांनी २५ वर्सां पिरायेच्या तरणाट्याक अटक केल्या. ताचेर तिच्या २ वर्सां पिरायेच्या सावत्र चलयेचो खून केल्ल्याचो आरोप आसा. ही घडणूक मानखुर्द हांगा घडली.
त्या तरणाट्यान सावत्र धुवेचेर लैंगीक अत्याचार करून ताचो खून केलो. ती आपल्या संबंदांत आडमेळीं हाडटा ह्या रागान तांणी अशें केलें.
पुलिसांनी दिल्ले म्हायती प्रमाण, बापायन चलयेचे खाजगी भागांत लाटणें घुसोवन तिचो गळो दामून खून केलो. चलयेची आवय घरा भायर कामाक आसतना बापायन ते चलये वांगडा अशें केलें. तशेंच आरोप्यान चलयेचो खून केले उपरांत सगळे पुरावे पुसून उडोवपाचो यत्न केलो.
ते चलयेचे आवयन पयल्या घोवाक घटस्फोट दिल्या उपरांत तीं दोगांय आरोपी वांगडा रावतालीं. ही चली नात्यांत आडखळ आसा अशें आरोपीक सदांच दिसतालें. ताका लागून त्या जोडप्या मदीं वाद जातालो. आरोपीक ते चलयेची सदांच तिडक येताली. ते दीस सदचे भशेन चलयेची आवय कामाक भायर सरली. दनपरां आवय घरा परतली तेन्ना ती चली बेशुद्ध अवस्थेंत आशिल्ली.
आरोपी आनी आवयन तिका लागसारच्या हॉस्पिटलांत दाखल केली. पूण तेन्ना मेरेन तिका मरण आयलें. तिच्या आंगाच्या कांय भागांचेर जखमो जाल्यात अशें दोतोरांनी सांगलें. देखून ताणें चलयेचे आवयक हे विशीं विचारलें. तेन्ना आरोपीन सांगलें की ती चली खेळटा आसतना पडली आनी तिका जखमो जाल्यो म्हणून. उपरांत दोतोरांनी हे विशीं पुलिसांक म्हायती दिली.
पुलिसांनी आरोपींची चवकशी केली तेन्ना ताणें पुलिसांक तेंच कारण सांगलें. पूण पुलिसांनी आरोपीक धेक दाखयले उपरांत ताणें चलयेचेर लैंगीक अत्त्याचार आनी खून केल्ल्याचें कबूल केलें. चलयेच्या आंगार मारपेट आनी गळो दामून मारिल्ल्याच्यो खुणो आशिल्ल्यो. भारतीय दंड संहिता आनी पोक्सो कायद्या खाला आरोपीचेर खून प्रकरणांत गुन्यांव दाखल केला. हे विशीं पुलीस फुडें तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
