भांगरभूंय | प्रतिनिधी
इंडियन प्रिमियर लिगेची दुसरी क्वॉलिफायर मॅच मुंबय इंडियन्स आनी पंजाब किंग्स ह्या पंगडां मदीं हांगाच्या सवाई मानसिंग स्टेडियमाचेर जातली. क्वॉलिफायर एकांत पंजाब किंग्साक रॉयल चॅलेंजर्स बंगळुरू आड हार घेवची पडिल्ली, जाल्यार मुंबय इंडियन्साक एलिमिनेटरांत गुजरात टायटन्साक म्हत्वाचें जैत मेळिल्लें.
आयची मॅच जिखून फायनलींतली तिकेट निश्चीत करपाचो दोनूय पंगडांचो यत्न आसतलो.
पंजाब किंग्स (त्या वेळार किंग्स इलेव्हन पंजाब) 2008त जाल्ले पयले आयपीएलाच्या हंगामांत नॉकआवटांत पाविल्लो. त्या वेळार सेमी फायनलींत ताका चेन्नय सुपर किंग्सान 9 विकेटींनी हारायिल्लो. ते उपरांत नॉकआवट वा प्ले ऑफांत पावपाक स वर्सां लागलीं. 2014त पयले सुवातेर रावन फायनलींत सुवात मेळयिल्ली. पूण, फायनलींत तांकां कोलकाता नायट रायडर्सान उमळशीक वाडोवपी लडतींत 3 विकेटींनी हारायिल्लो.
ते उपरांत प्ले ऑफांत पावपाक 11 वर्सां लागलीं. अंदूं 14 मॅचींतल्यान 19 गूण घेवन गुणतकट्यांतली पयली सुवात मेळयिल्ली. पूण, क्वॉलिफायर एकांत ताका रॉयल चॅलेंजर्स बंगळुरू कडल्यान 8 विकेटींनी हार घेवची पडिल्ली. ताचो डाव फकत 101 धांवड्यांचेर सोंपलो. आयची मॅच जिखपाक जाय जाल्यार ताका फकत प्ले ऑफांतलो न्हय जाल्यार मुंबय इंडियन्सा आडचो रॅकॉर्ड सुदरावपाचो पडटलो.
पंजाब अजून मेरेन पांच प्ले ऑफ मॅची खेळ्ळा आनी फकत एके मॅचींत ताका जैत जोडपाक शक्य जालां. हातूंत अंदूंच्या क्वॉलिफायर एकाचो आस्पाव आसा. दुसरे वटेन जोड रितीन पांच खेपे आयपीएल जिखपी मुंबय इंडियन्स प्ले ऑफांत 21 मॅची खेळ्ळा. तातूंतल्या 14 मॅचींनी जैत मेळ्ळा जाल्यार सात मॅची हारला. अहमदाबादांतलो ताचो रॅकॉर्ड तितको बरो ना. ताका फकत एक मॅच जिखपाक येस आयलां जाल्यार पांच मॅचींनी हार घेवची पडल्या. गुजरात टायटन्सा आडचे मॅचींत जे तरेन ताणें प्रदर्शन केल्ले तशेंच प्रदर्शन आयचे मॅचींत करपाचो ताचो यत्न आसतलो.
पंजाब किंग्सान अंदूं 14तल्यो 9 मॅची जिखून गुणतकट्यांतली पयली सुवात मेळयिल्ली. ताणें लिगेंतल्यो आपल्या निमाण्या पांचांतल्यो चार मॅची जिखिल्ल्यो. हातूंत मुंबय इंडियन्सा आड 7 विकेटींनी मेळयिल्ल्या जैताचोय आस्पाव आसा. पूण, क्वॉलिफायर एकांत रॉयल चॅलेंजर्स बंगळुरू आड ताणें प्रदर्शन केल्लें. तें पळयल्यार, ताच्या फॉर्मा विशीं दुबाव उप्रासता.
दुसरे वटेन मुंबय इंडियन्सान सदचे भशेन सुरवातीक बाबत प्रदर्शन केल्लें. सुरवातीच्या पांचांतल्यो चार मॅचींनी हार घेवची पडिल्ली. पूण, उपरांत ताणें जबरदस्त पुनरागमन करून सेगीत स मॅच जिखल्यो आनी प्ले ऑफांतली आपली सुवात निश्चीत केली. निमाण्या तीन लीग मॅचींतल्या दोन मॅचींनी ताका हार घेवची पडिल्ली. पूण, एलिमिनेटरांत ताणें जे तरेन प्रदर्शन केलां, तें पळयलां जाल्यार ताचो आत्मविस्वास बरोच वाडिल्लो आसा हें स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
