भांगरभूंय | प्रतिनिधी
पेडणें म्हालांतल्या धारगळे मुंबय-गोंय राष्ट्रीय महामार्गार एसटी आनी दुचाकी मदीं एक भिरांकूळ अपघात जालो. हातूंत निल्लीच्या भाटीवाड्यावेल्या सुदीप पयकार (२०) ह्या तरणाट्याक एसटीखाला चिड्डून मरण आयलें.
हे विशीं चड म्हायती प्रमाण, हो तरणाटो ३० जुलयाक दनपरां दुचाकीन धारगळच्यान पर्वरेचे दिकेन येतालो. दोन खांब हांगा पावतांत कोल्हापूरच्यान पणजे दिकेन वचपी हिरकणी एसटीन सुदीपाचे दुचाकीक नेटान धपको दिलो. ह्या धपक्यान तो उसळून रस्त्यार आपटलो आनी एसटीच्या टायरा पोंदा पडलो. हातूंत ताका मरण आयलें.
कांय वेळांत थळावे पुलीस घडणुके सुवातेर पावले. तांणी आडकल्ली येरादारी सुरळीत केली. तशेंच पंचनामो करून कूड पोस्टमार्टमा खातीर गोमॅकोंत धाडली.
मजगतीं, हो तरणाटो दुचाकी चलयतना फोनाचेर उलयतालो असो दावो घडणुके सुवातेर हजर आशिल्ल्या कांय जाणांनी केला. हे विशीं पुलिसांनी एसटी चालकाची चवकशी सुरू केल्या. सीसीटीव्ही फुटेज पुलीस तपासतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
