भांगरभूंय | प्रतिनिधी
मुंबय, खबरां संस्था: चवथीक कांय दीस उरल्यात. हांगाच्यान चवथी पयलीं कांय दीस जायते जाण गांवाची वाट धरतात. कोकणांत वचपी चडशे मुंबय- गोंय म्हामार्गावेल्यान वतात. ह्या रस्त्या विशीं एक म्हत्वाची म्हायती मुखार आयल्या. चवथीच्या काळांत म्हामार्गाचेर जड वाहनांची येरादारी बंद दवरतले. गणेशोत्सवा खातीर कोकणांत येवप्यांचो प्रवास सोंपो जावचे खातीर सध्या कांय उपाय चालीक लायल्यात. ताचो भाग म्हणून जड वाहनांची येरादारी बंद दवरपाचो निर्णय घेतला.
मेळिल्ले म्हायती प्रमाण, ह्या निर्णयाचे फाटभूंयेर ५ सप्टेंबराक रातचें १२ वरां सावन ते ८ सप्टेंबराक रातीं ११ वरां मेरेन ही येरादारी बंदी लागू आसतली. ५, ७ दिसांच्या गणेशमुर्तीचें विसर्जन, गौरी गणपती विसर्जन, परत येवपाचो प्रवास हे खातीर ११ सप्टेंबर रातीं ८ ते १३ सप्टेंबराक रातीं ११ वरां मेरेनूय ही येरादारी बंदी आसतली. फुडें अनंत चतुर्दशी म्हळ्यार ११ दिसांच्या गणेशमुर्तींच्या विसर्जना खातीर आनी उपरांतल्या परत वचपाच्या प्रवासा खातीर १७ सप्टेंबर सकाळीं ८ ते १८ सप्टेंबर रातचें ८ वरां मेरेन येरादारी बंदी आसतली. जड वाहनांचे येरादारीक ह्या मार्गाचेर कांय दीस बंदी घाल्ल्यान ताचो फायदो सामान्य प्रवाशांक जातलो.
मजगतीं, सोमवार, २६ ऑगस्टाक मुख्यमंत्री एकनाथ शिंदे हे मुंबय- गोंय म्हामार्गाची पळोवणी करतले. फाटल्या १४ वर्सां सावन ह्या म्हामार्गाचें काम आडकून पडलां. ताका लागून कोंकणच्या लोकांक बरेच त्रास सोंसचे पडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
