भांगरभूंय | प्रतिनिधी
कणकवली, खबरां संस्था ः मुंबय- गोंय म्हामार्गाचेर वागदे- कणकवले हॉटेल मालवणी लागसार कंटेनराक फाटल्यान स्कूटरीन धपको दिल्ल्यान संकेत नरेंद्र सावंत (24, परबवाडी- कणकवली) आनी साहिल संतोष भगत (23, विद्यानगर- कणकवली) ह्या दोग तरणाट्यांक सुवातेरुच मरण आयलें.
हो अपघात मध्यानरातीं अडेजांक घडलो. रस्त्या कुशीक पार्क केल्ल्या कंटेनराक फाटल्याच्यान स्कूटरीन नेटान धपको दिलो. संकेत आनी साहिल कणकवली सावन ओरोसच्या वटेन वताले तेन्ना हो अपघात जालो.
अपघाताची म्हायती मेळ्ळ्या उपरांत पुलीस निरिक्षक मारुती जगताप हांचे वांगडा पुलीस उपअधीक्षक राजकुमार मुंढे, सहाय्यक पुलीस उपनिरीक्षक राजेंद्र नानचे, संतोष शिंदे अपघाताच्या सुवातेर पावले. हे सुवातेर जड वाहनां सदांच पार्क केल्ली आसतात. ताका लागून रातच्या वेळार प्रवास करतना रस्त्याचो अदमास येना आनी अपघाताचो धोको वाडटा. अपघात जालो तेन्ना पावस पडटालो. थंय काळोख आशिल्लो. ह्याच कारणाक लागून संकेत आनी साहिल हांचो अपघात जाला आसूं येता असो मुळावो अदमास पुलिसांनी उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
