भांगरभूंय | प्रतिनिधी
मुंबय, खबरां संस्था: सगळे कडेन नाताल आनी नव्या वर्साची उमेद आसतना सगळ्यांचीं पावलां पर्यटन स्थळां कडेन वळ्ळ्यांत. बुधवारा सकाळ सावनूच जायते पर्यटक खाजगी गाडयो घेवन गोंय, महाबळेश्वर, कोकणांत पर्यटना खातीर भायर सरिल्ल्यान ह्या मार्गांचेर बरीच येरादारी कोयंडी आशिल्ली. खंडाळा घांटार गाडयांच्यो दहा ते बारा किलोमीटर लांब रांको लागिल्ल्यो. पुणे उपरांत सरळ सातार्या मेरेन ही कोयंडी कायम आशिल्ली. जाल्यार कोकणांत गेल्ल्या पर्यटकांक मुंबय-गोंय महामार्गाचेरूय येरादारी कोयंडी जाल्ल्याचें चित्र पळोवपाक मेळ्ळें.
मुंबय- गोंय महामार्गार कोलाड, माणगाव, इंदापूर पट्ट्यांत वाहनांच्यो रांको लागिल्ल्यो. कांय वाहन चालक लेनची शिस्त पाळी नाशिल्ल्यान हे येरादारी कोयंडीचे समस्येंत आनीक भर पडटाली. कोलाड, नागोठणे वाठारांत सुरू आशिल्लीं कामां येरादारीक आडखळ निर्माण करतालीं. वाहनांचो आंकडो अचकीत वाडिल्ल्यान येरादारीचें नियमन करपाक पुलीस अपेणी थारल्यात. वडखळ अलिबाग राष्ट्रीय महामार्गार शहाबाज ते पोयनाड आनी खंडाळे ते अलिबाग मजगतीं येरादारी कोयंडी जाल्या. ताका लागून अर्द वराचें अंतर हुपपाक देड-दोन वरां लागतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
