भांगरभूंय | प्रतिनिधी
रत्नागिरी, खबरां संस्था: मुंबय-गोंय महामार्गावेल्यान चवथी खातीर प्रवासी घेवन कोंकणाक येवपी एके खाजगी बशीक उजो लागलो. मुंबय सावन मालवणाक वचपी हे बशीक मध्यानरातीं सुमार २ वरांचेर कशेडी बोगद्या लागसार अचकीत उजो लागलो. बशींतले सगळे प्रवासी सुरक्षीत आसात. ड्रायव्हराचे शिटूकसाणेक लागून व्हडली दुर्घटना जावपा पसून वाटवली. ह्या उज्याचें खरें कारण आजून कळूंक ना.
हे विशीं मेळिल्ले म्हायती प्रमाण, हे बशींतल्यान ४५ प्रवासी प्रवास करताले. कशेडी बोगद्याचेर बस पावतकच अचकीत बशीक उजो लागलो. ड्रायव्हराक हें कळटांच ताणें रोखडीच बस कुशीक काडली आनी बसींतल्या सगल्या प्रवाशांक सकयल देंवयले. हाका लागून सगल्या प्रवाशांचो जीव वाटवलो. मात गणेशोत्सवा खातीर घरा वचपी प्रवाशांचें सामान लासून गोबोर जालें.
हे घडणुकेची म्हायती मेळटांच खेड नगरपरिषशदेच्या उजो पालोवपी दळान उजो नियंत्रणांत हाडलो. प्रवाशांनी आपल्या मूळ गांवांत वचपा खातीर पर्यायी वाहनांची वेवस्था केली. बशीचो टायर चड गरम जाल्ल्यान उजो लागला आसूं येता असो अदमास आसा. चवथी पयलीं हें येदें व्हडलें संकट पयस जाल्ल्यान प्रवाशांनी सुटकेचो उस्वास सोडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
